Lok Sabha Elekshon: Pynslem ka ‘BOM’ ïa ka MDA ban ïoh ïa u kyrtong monlang sha elekshon MP na Shillong

‘Lada ïaleh da kawei ka shap ngin shah rem’

Shillong, Lber 14: Ka jingmynjur jong kiba bun ki seng saiñ pyrthei ïa ka jingtyrwa jong ka United Democratic Party (UDP) ban pynieng da u bah Jemino Mawthoh kum u kyrtong monlang (common candidate) sha ka elekshon MP Lok Sabha ka don bun ki daw, la ïathuh uwei u nongïalam jong kawei na ki seng kiba ïadonlang lang ha ka MDA.

Hapoh ka Meghalaya Democratic Alliance (MDA), ki seng kiba pynieng ïa u kyrtong monlang ki kynthup ïa ka National People’s Party, ka UDP, ka People’s Democratic Front, ka Hill State People’s Democratic Party, ka Nationalist Congress Party bad ki kyrtong shimet.

Ha ka MDA, ka seng ka bym don bynta ban pynieng kyrtong ba ïa monlang dei tang ka seng Bharatya Janata Party (BJP) kaba don arngut ki MLA.

Ka BJP kaba khlem treh ban don bynta lang ka la shim ïa ka rai ban pynieng hi da la u jong u kyrtong na ka bynta ka elekshon MP Lok Sabha hapoh Shillong Parliamentary konstitwensi.

Ka elekshon MP Lok Sabha kumba la pynbna da ka Election Commission jong ka Ri India hapoh ka Jylla Meghalaya kaba don artylli ki konstitwensi ka don artylli ki konstitwensi – Shillong bad Tura konstitwensi.

Ïa ka kyrteng jong u bah Jemino Mawthoh kum u kyrtong monlang jong ka MDA la pynbna ha ka 11 tarik, 2019 hadien ki jingïakynduh kiba la ju pynlong bunsien kata naduh u snem ba ladep.

Hashuwa, ba ka MDA kan ai jingmynjur ïa u bah Jemino kum u kyrtong monlang, ka UDP ha ka 31 tarik Risaw, 2018 ka ladep pynbna ïa la u jong u kyrtong hadien ka jingjied jong ki nongkitkam napdeng ki artylli ki kyrteng kaba kynthup jong u MDC ka Jaïaw ba mynta, u bah Paul Lyngdoh.

Hadien ka jingtwad jingmut ban lap ïa ka daw jong ka jingslem ki seng kiba don ha ka MDA ban pdiang ïa u kyrtong ba la pynbna da ka UDP, kawei na ki kadei ba kim pdiang ïa ka Bom kum ka shap ba u kyrtong udei ban ieng.

Kum ban shu pyntip, ka Bom kadei ka shap jong ka UDP bad kawei ki seng kiba don ha ka MDA ruh ki don la ki jong ki shap haba ki ïakhun elekshon naduh ka elekshon MLA bad MDC.

Uwei napdeng ki nongïalam jong ka seng kaba don ha MDA u la ong, ngim shym la mon ba u kyrtong monlang un ïakhun na ka shap jong kano kano ka seng kaba don ha MDA.

“Ngi la tyrwa ba lada lah, dei ban ïakhun ïa ka elekshon ha ka shap ba ïa monlang,” la ong une u nongïalam na kawei ka seng.

Uwei pat u MLA uba don ha kawei ka seng kaba kyrshan ïa ka MDA bad u bym shym la kwah ban pynpaw kyrteng, u la ong, dei na kane ka daw ba lamih ka jingïapyni ñia bad ban pynlong ïa ka PDF kaba don saw ngut ki MLA bad HSPDP ba don arngut MLA ban thmu pynieng la u jong u kyrtong.

Napdeng kitei ki artylli ki seng, dei tang ka HSPDP kaba la pynbna ïa u MLA ka Mawkyrwat, u bah Renikton Lyngdoh Tongkhar kum u kyrtong katba ka PDF pat kam shym la pynbna.

Hynrei katkum ka jingïathuh jong u nongïalam na ka seng NPP, la ong ba dei na ka jingïakren sngewthuh bad ban pynsngewthuh bha ïa kito seng ba donlang, la lah ban pdiang ïa ka jingtyrwa ka UDP kata ha ka jingïalang ba lawan shim bynta da u Myntri Rangbah u Conrad Kongkal Sangma.

Haba ïadei bad kane ka jingeh kaba mih, u President ka UDP, u Dr Donkupar Roy u ong, lada ym ïakhun na kawei ka shap kaba la kham paw kan nym don jingmyntoi namar kan wanrah jingeh ban pynsuhthied ha ki nongthep vote da ka shap kaba thymmai.

Shuh shuh, u la ong lada ïakhun da ka shap kaba monlang, nga tieng ba ïoh kan jia kum ha u snem 2004.

Ha u snem 2004, ki seng riewlum ha ka kynhun jong ka Regional Parties Alliance (RPA) ki la pynieng da u bah S Loniak Marbaniang uba dei na ka seng HSPDP kum u kyrtong monlang.

U bah Marbaniang ha u 2004 u la shah pynliem ha u kyrtong katba Congress, u bah PR Kyrdiah (ba la khlad noh).

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589