Mynjur ka Cabinet ïa ka “Integrated Scheme for Development of Silk Industry”

New Delhi, Lber 22: Ka Cabinet Committee halor ka Economic Affairs ba la pynïaid da u Prime Minister Narendra Modi, ka la ai ka jingmynjur jong ka na ka bynta ka “Integrated Scheme for Development of Silk Industry” kaba long ka scheme jong ka sorkar pdeng ha ki lai snem ban wan naduh u snem 2017-18 haduh 2019-20.

Kane ka Scheme ka don saw bynta – (i) Research & Development (R&D), Training, Transfer of Technology bad ka IT Initiatives, (ii) Seed Organizations and farmers extension centres (iii) Coordination and Market Development for seed, yarn and silk products bad (iv) Quality Certification System (QCS) da kaba wanrah ia ki lad ban test ia ki sai nalia (Silk), Farm based & post-cocoon Technology Up-gradation bad ka jingshalan ia ki mar.

La mynjur ïa ka jingmang tyngka kaba T. 2161.68 klur na ka bynta ban pyntreikam ia ka scheme haduh lai snem naduh u 2017-18 haduh 2019-20. Ia kane ka scheme yn pyntreikam da ka Ministry lyngba ka Central Silk Board (CSB).

La khmih lynti ba kane ka scheme kan kyntiew ia ka jingpynmih sai nalia na ka 30348 MT ha u 2016-17 sha ka 38500 MT ha kaba kut jong u 2019-20 da ka jingkynthup lang ia kine harum:

• Ka jingpynmih ia ki bivoltine silk ba ju wanrah na shabar ri kan long 8500 MT man ka snem hapoh u 2020.
• Ka Research& Development kan kyntiew ia ka jingpynmih sai nalia na ka 100 Kg kaba long mynta sha ka 111 kg shi ha. hapoh u snem 2019-20.
• Ka jingpynbun ia ki reeling machine katkum ka juk ba mynta (Automatic Reeling Machine na ka bynta u mulberry; ki reeling/spinning machine ba mynta bad ki Buniyad reeling machine na ka bynta u Vanya silk)hapoh ka Make in India programme ban pynmih ia u sai naila ba bha ban pynbiang bad pyndap ia ka jingdawa ha ki iew ki hat.

Kane ka scheme kan kyntiew ia ka jingpynkupbor ia ki kynthei bad ki lad kamai jakpoh sha ki jaitbynriew SC/ST bad kiwei kiwei de kiba duna ha ka imlang sahlang. Kane ka scheme kan iarap ban kyntiew ia ki lad ai kam ai jam na ka 85 lak sha ka 1 klur ngut ki briew hapoh u 2020.

Kane ka scheme ka la nang kham bha ia ka scheme kaba rim:
(i) Ka jingthmu jong kane ka scheme kalong ban lah ban pyndap hi dalade ia ka jingpynmih sai nalia hapoh u snem 2020. Ban poi sha kane ka thong, ka jingpynmih sai nalia ha India kan long 20,650 MT hapoh u 2022 na ka 11,326 MT kaba long mynta da kaba pynduna ia ka jingwanrah na shabar ri sha ka Zero.
(ii) Ha ka sien ba nyngkong, ka don ka jingphaikhmat kaba shai halor ka jingkyntiew ia ka jingpynmih sai nalia ba bha. La tyrwa ban kyntiew 4A grade silk na ka kyrdan ba mynta kaba long 15% sha ka 25 % na ka jingpynmih mulberry hapoh u 2020.
(iii) Ka jingpyntreikam ka shong ha ka jingiatreilang ha ka State level ryngkat bad ki scheme jong kiwei ki Minister kum ka MGNREGS jong ka Rural Development, RKVY & PMKSY jong ka Ministry of Agriculture, ban wanrah ka jingmyntoi ha ka sericulturists.
(iv) Ki R&D project ba iadei shaphang ki jingialeh pyrshah ia ka jingpang ba ktah ia ki niang rasom, ka jingpynbit pynbiang ia ki tiar bad ka jingpyntreikam ha ka ban thain bad kiwei kiwei kan long hapoh ka jingiatreilang bad ki Ministry lyngba ka Science and Technology, Agriculture and Human Resource Development (HRD).
Ka phang pdeng jong kane ka scheme kalong ban kyntiew ia ka jingpynmih ia u silk uba bha lyngba ka jingshimkhia ka R&D. Ka jingphaikhmat jong ka R&D kalong ban kyntiew ia ka crossbreed silk u Bivoltine silk khnang ba ka jingpynmih ia u Bivotine silk ha India kan nang kiew haduh kata ka kyrdan ban lah ban pynbiang hi dalade ia ka jingpynmih silk khlem da wanrah nabar ri hapoh u 2022 da kaba pynlong ia ka ri India kaba pahuh ha u sai nalia. Ka jingphaikhmat jong ka R&D kan long ban iada na ka jingeh kaba ktah ia ka jingkha roi ki niang rasom da kaba leh ia ki jingwad bniah bad ki jaka wad bniah kiba pawkhmat ha ka ri kum ki IIT, CSIR, IISc bad ki international research institute ha ka Sericulture ha Japan, China, Bulgaria bad kiwei kiwei; ka jingkyntiew ha ka teknoloji ha kaba iadei bad ka pre coccon bad post cocoon sector. Yn phaikhmat ha ka jingkyntiew ia ka teknoloji bad ban pynioh ia ki machine ha ka dor kaba jem.
Yn dang kyntiew ruh ia ka jingpyndonkam ia ki jingmih na u niang rasom na ka bynta ban ai bam ia ki syiar, ban pynmih ia ka sericin ba pyndonkam ha ki tiar tah iphuh iphieng, bad ruh ia ka jingpynpher ia ki tiar ba lah ban pynmih na une u niang rasom kum ki jain silk denim, silk knit bad kiwei kiwei pat. Hapoh ka thup jingpynmih ia ki symbai (seed sector), yn dang pynkhlain ia ki Seed Production Units khnang ba kine kin lah ban trei kham bha bad khnang ba kin lah ban pyndap ia ka jingdawa ia u sai nalia. Yn ai jingiarap ruh ia ki nongri niang rasom khnang ba kin lah ban pynmih ia ki symbai kiba bha. Yn wanrah ruh ia ki Chawki Rearing Centres (CRS) khnang ban lah ban pynmih ia ki khniang chawki. Yn wanrah ruh ia ki cold storage, ki mobile disinfection units ryngkat bad kiwei kiwei.
Yn pyndonkam ruh ia ka bor jong ka internet ha kaba leh registration hapoh ka Seed Act. Ia ki jingai jingtip jong ki seed production centre, ki seed farm bad ki extension centres ruh yn leh da kaba pyndonkam ia ka bor ka internet. Ia baroh kiba ioh jingmyntoi na kane ka scheme ba kynthup ia ki nongrep sai nalia, ki nongpynmih silk bad ki nongri chawki yn wanrah hapoh ka DBT mode bad ka jingiasoh bad ka Aadhaar. Yn wanrah ruh ia ka helpline ban ai jingiarap kaba kloi.
Ban pyniaid iew ia ki mar ba la shna na u sai nalia na India yn pynshlur lyngba ka jingithuh da ka Silk Mark ym tang ha ki iew hapoh ri hynrei shabar ri ruh kumjuh. Ia ki symbai niang rasom, cocoon bad ki sai nailia bym pat shna yn kyntiew da kaba wanrah ia ka Cocoon Testing Centres & Silk Testing Centres. Ia ki jingpyrshang yn pynkhlain da kaba iatreilang bad ka NIFT bad ka NID ban kyrshan ia ka jingsaindur bad jingkyntiew ha ka jingpynmih ia u sai nalia uba bha.