Mynjur ka KHADC ïa ka resolution halor ka ILP bad MRSSA

Shillong, Risaw 27: Ka sngi sdang jong ka Dorbar Tlang jong ka Khasi Hills Autonomous District Council, ka la sakhi ia ka jingmynjur ia ka Resolution ban kyntu ia ka Sorkar India ba kan mynjur noh ia ka  Bengal Eastern Frontier Regulation 1873 ba la tip kum ka Inner Line Permit.

U Chief Executive Member ka Council , Bah TW Chyne u la ong ba ka jingpyntreikam ia katei ka ain kan wanrah ka jingshngaiñ bad ka jingiada ia ki nongshong shnong ka jylla nalor ba kan pyllait ruh wat na ka Citizenship Amendment Act 2019 kumjuh ban khanglad ia ki mynder ri ba kin rung katba mon sha kane ka jylla.

La pynkynmaw ruh ba ka Iing Dorbar Thawaiñ ka jylla ha ka 19tarik u Nohprah 2019 ka la mynjur da ka Resolution ban pyntreikam ia ka ILP bad ki la leit ruh ban kynduh ia ka sorkar India.

Ka KHADC ha kaen ka sngika la mynjur ruh da ka Resolution ban kyntu ia u Lat ka Jylla ban mynjur noh ia ka Meghalaya Resident Safety and Security (Amendment) Bill, 2020 kham kloi.

Kawei pat ka Resolution ba ka Council ha kane ka sngi ka mynjur ka long ban kyntu ia ka sorkar Meghalaya ban pyntreikam pura ia ka Meghalaya Residents Safety and Security Act, 2016 bad ka Meghalaya Residents Safety and Security Rules,2017 kham kloi.

Ha kajuh ka por u la kyntu ruh ban pynstet na ka bynta ban tei noh ia ki Facilitation Centre ha man ki entry bad exit point.