Mynsaw 6 ngut ki samla ba shah bom ha ki palat 20 ngut ki runar ha Lawsohtun

Shillong, Naitung 3: Hynriew ngut ki samla kiba dei jaidbynriew na kiwei pat ki Jylla, ha ka shiteng sngi thohdieng, ki la mynsaw jur hadien ba ka kynhun ba palat 20 ngut ki samla, kiba la kah dur khmat bha ialade, ki la hiar thma bad bom naphang ia ki da ki nar rod bad ki dieng ha madan ialehkai Basketball ha Lawsohtun.

Katkum ka khubor ba la iohlum la ong ba kine ki samla bym dei ki trai Jylla kiba dei na ka thaiñ Last Stop, Jhalupara, Lauchumiere bad Barapathar kiba don 9 ngut, kumba long man la ka sngi ki shait leit ialehkai Basketball ha Lawsohtun bad ha sngi thohdieng kumba ha ka por 11 baje mynstep.

Kynsan ki la wan ki samla kiba kham rit rta kiba don kumba 20 ngut eiei ki la wan kynsan ban bom naphang ia ki da ki nar rod bad ki dieng. Kine kiba la shah bom pathar ki la phet na katei ka jaka ban pyllait im ialade bad hynriew ngut ki la mynsaw jur kynthup uwei uba la kham mynsaw jur ia uba la pynkit sha Super Care Hospital ha ka nohphai sngi thohdieng.

Kine kiba la shah bom pathar ki la mynsaw kdiah kti kdiah kjat, ha ki bynta khlieh bad mih snam. La pynkit ia kine baroh sha ki jaka ai jingsumar. Katkum ki jingtip la ong ba kine kiba la shah bom pathar ki shait wan ialehkai ha kane ka madan ialehkai Basketball la katto katne taiew naduh ba don ka jingkhang khyrdep (lockdown).

Kham hadien ka tnad pulit ka la ai jingtip ba kine kiba la mynsaw ki kynthup ia u Aridam Das (22) na Laban, u Subharshi Das Purkayastha (22) bad u Saptarshi (20) na Last Stop, u Pinak Deb (23) na Baraparhar, u Bishal Ghosh (24) na Lachumiere .

Ia kiba mynsaw la pynkit ruh sha Woodland Hospital. Ka kyrwoh khubor na ki pulit ka ïathuh ba na kine kiba mynsaw ki don kiba la kham koit bad pyllait leit phai noh sha iing. La ïathuh ruh ba la ujor ejahar halor kane ka jingjia da ki kmie ki kpa jong lai ngut ki khynnah.

Haba ia kren bad u Superintendent of Police ka East Khasi Hills, u Bah Sylvester Nongtnger, u la ong ba ka tnad pulit ka la ïoh pdiang jingtip halor kane ka jingjia ka la jia ha ka por 12 shiteng. “Ki khynnah ba kham rit kiba la deng mask bha ki la leit ban shoh ia ki khynnah ba kham heh da ki nar bad ki dieng ha Lawsohtun ha madan Basketball”, u la ong.

“Hynriew ngut na ki kila mynsaw. Mar ia ioh jingtip ki pulit ki la leit sha katei ka jaka hynrei ym lap shuh iano iano. Ngi dang tohkit bad wad bniah ia kane, ia ka daw ba mih ka jingshah shoh kine ki samla”, u la ong.
Na ka liang u Rangbah Shnong ka Lawsohtun, u Bah Lurshai Shylla, u la ong ba ki khynnah kiba shah shoh kim dei na ka shnong Lawsohtun. “Nga lyngngoh ba kiba shah shoh ki dei kiba wan na kiwei pat ki jaka ban ialehkai shane”, u la ong.

“Ngi na ka liang ka shnong ruh ngi dang wad bniah wad jingtip mano ba donkti ban shoh ia kine ki briew”, u la ong. “Mar ia ïoh jingtip nga la leit sha katei ka jaka hynrei ynda poi ym don mano mano ruh”, u la ong. “Ngim pat ioh jingtip mano ba leh ia kane ka kam”, u la ong.