Mynsaw jur uwei khynnah skul ba kylla ka bos skul ha 9 mer, dei ka jingbuaid u draibar

Nongpoh, Lber 12: Uwei u khynnah skul mynta ka sngi u la mynsaw jur hadien ba kawei ka bos skul jong ka Little Star School kaba don ha 9 Mer Baridua, Ri Bhoi District ka la kylla ha ka por ba ka dang wan shaw ia ki khynnah skul na ka shnong Jorbil.

Kane ka jingjia ka la jia ha ka por mynstep ha ka por ba ka bos ka dang don ha lynti ban leit buh ïa ki khynnah bad mar ia poi ha ka shnong Killing, katei ka bos ka la kylla.

Ha kane ka jingjia, uwei napdeng ki khynnah skul uba dang hynniew snem ka rta u la mynsaw jur bad la pynkit mar mar sha GNRC Hospital, Guwahati na ka bynta ban ioh ia ka jingsumar. Donbok ba ha kane ka sngi ki don tang kumba shiphew ngut ki khynnah skul kiba shong ha katei ka bos kiba la mynsaw lang ruh ha katei ka jingjia.

Haba pyrshang ban wad ia ka daw jong ka jingjia, la lap ba u nongniah jong kane ka bos skul, uba la tip kyrteng kum u Jayanta Ingil (35) u la shoh khawyiang bad pynher sted ia katei ka bos skul bad haba ki khynnah skul ki pyrshang ban ong ia u ban niah suki, u tim pynban ia ki khynnah skul bad ong artad iaki ba kin shim niah hi, da kaba ai ruh de ia u shabi. Hadien kane ka jingjia na ka liang jong une u nongniah jong kane ka bos u phet krad noh ialade.

La ioh jingtip ruh ba katei ka bos skul kadei kaba khlem don jingpynbha shuh mynta la arsnem bad kaba la don ka jingthut bad ka jingsniew ha shilynter jong u surok Killing ha ryngkat ki thliew ki syar ruh kadei sa kawei ka dawbah kaba la pynlong ia katei ka bos ban kylla ha katei ka jaka.

Haba pyrshang ban iakren bad ki kmie ki kpa jong ki khynnah skul, ki la iathuh ba ki la dep ban ujor la bunsien sha u Principal jong katei ka skul halor ka jingniah khlem akor ka jong u, hynrei na ka liang jong u Principal u khlem leh eiei bad kane ka jingjia ka la pynsngewsih bad pynbitar shuh shuh ia ki kmie ki kpa jong ki khynnah skul kiba la poi lang ha kane ka jaka halor ka jingleh mynthi jong u Principal.

Ka jingsniew jong u surok naduh ka surok bah NH-6 shaduh Killing ter ter kadei khamtam na ka jingiaid jong ki kali Dumper kiba shiphew shaka kiba kit maw palat ia ka 9 tonne katkum ka jinglah jong u surok.

Na ka liang ki paidbah jong kine ki shnong, ki la pynpaw ia ka jingsngewkhia bad ka jingdiaw kaba jur halor kane ka jingjia, ha kaba ki la kynthoh ruh ba la don ki Association kiba la kaba ju lum khajna kumba T. 5000/- ia ki kali local bad T.7000/- ia ki kali kiba dei nabar na ka bynta ban pynbha ia u surok hynrei phewse kane ka Association ka la shu shim tang ia ka pisa bad khlem leh eiei ban maramot ia u surok.

Ki la iathuh ruh ba ka la don ka jingialang hapdeng ki trai jong ki trok kit maw, ki trai par maw bad ki sengbhalang hapoh jong ka shnong Jorbil na ka bynta ban khang noh ia ki kali dumper shiphew shaka kiba kit palat ia ka 9 tonne haba kaba la shim ia ka rai ban khang naduh ka 28 tarik jong u bnai balah dep hynrei kane ka jingrai ka shu jah kumto khlem pyntrei kam satia.

Na ka liang jong ki pulit ka Ri Bhoi kiba la dang pynlong ia ka jingtohkit halor kane ka jingjia bad ruh ban thwet ia u tei u dribar jong kane ka skul bus.