Na ka jingthut ka bor ding elektrik, pluh ka ïing ha Dhanketi

Shillong, Naitung 03: Ki thylliej ding kiba rhem ha ka miet jong ka 2 tarik u bnai Naitung, 2020 ki la bam shngiam ïa ka jaka buh tiar jong ka mala ba hajrong jong ka Woodland Hospital, Shillong kaba don hajan ka skulbah ICFAI, Malki, Dhankheti, Shillong.

Haba buddien halor jong kane ka jingjia, u Superintendent of Police ka East Khasi Hills u Bah Sylvester Nongtynger ha ka jingiakren bad ki lad pathai khubor u la iathuh ba ka jingpluh jong kane ka iing buh tiar ka dei na ka jingthut jong ka bording elektrik.

“Ka jingthut ka bor ding elektrik ka la pynlong ia kane ka iing ban kem ding kynsan bad pur kynsan sha ka mala kaba hajrong nalor ba ka dei ruh da ka iing dieng kaba rim”, la ong u SP.

Kane ka iing buh tiar kaba dei da ka iing dieng kaba la kham rim bad kaba don kham pajih na ka jaka thiah ki nongpang jong ka Woodland Hospital ka la kem ding ha ka por kumba 9:00 baje eiei mynmiet.

“Shwa ba ki thylliej ding kin ioh bam duh ruh ia ka mala kaba shapoh kaba dei da ka iing dewbilat, ki kali pynlip ding jong ka tnat Fire and Emergency Services, ba don hajan ka madan Iewrynghep, Shillong ki la wan her mar mar ban pynlip noh ïa ka ding kaba la sdang ban pur sha ka iing baroh kawei”, la ong u Bah Nongtnger.

U la ong ba san tylli ki ki kali pynlip ding kila lah ban pynlip ia ka ding ha ki 15 minit ba ki la wan poi wat hapdeng ka jingkhim ka lynti.