Naduh 22 tarik yn plie noh ia ki dukan ha Ïewduh tangba ym baroh

Shillong, Jylliew 16: Ka Ïewduh kaba dei ka iew kaba heh tam ha rilum Khasi Jaintia naduh ka 22tarik mynta u bnai kan sdang ban plie biang, tangba ki dukan kiba plie kin dei tang kumba 30 haduh 33 persen, pynbna ka sorkar jylla ha kane ka sngi Baar.

Haba pyntip ia kane, u Symbud Myntri Rangbah ka jylla, Bah Prestone Tynsong u la ong ba ki don baroh 1222 tylli ki dukan kiba don ha Iewduh hynrei ia kitei baroh la bthah ba kin lah ban plie pud sngi katkum ka jingbthah kaba wan na ka ophis treikam jong ka Deputy Commissioner jong ka East Khasi Hills District.

“Ha ka review meeting ngi la rai ba ngin shah ban plie noh tang kumba 30 – 33 persen ki dukan man ka sngi da kaba kylliang sngi ryngkat ka jingbthah ban bud pyrkhing ia ki kyndon ba la buh,” ong u Symbud Myntri Rangbah.

La pynban pat ba ia ki dukan dohkha, ki dukan doh, ki iew jhur bad ki dukan kwai ym pat shah ban plie kynthup lang wat ia ki dukan kot.

Kawei pat ka rai ka long ba yn ym pat shah ia ki nongdie madan ba ki die jingdie. La kdew ruh ba ki don kumba 1000 tam ki nongdie madan kylleng ki bynta jong ka Iewduh kiba ju die ia ki tiar khutia jong ki man ka sngi.

Kawei pat ka rai ba ka sorkar ka shim ka long ba ia ki iew ha ki shnong ki thaw yn sa shah ban plie noh naduh ka 29tarik mynta u bnai hi.