Naduh 22 tarik yn plie noh ïa ki restaurant bad jaka khap shniuh

Shillong, Jylliew 17: Ka review meeting jong ka sorkar jylla kaba long ha kane ka sngi Balang ka la rai ba naduh ka sngi Nyngkong ban wan, kata naduh ka 22tarik mynta u bnai la shah ban plie noh ia ki restaurant, kumjuh ki jaka khap shñiuh bad ruh ia ki beauty parlour.

Haba kren bad ki lad pathai khubor, u Symbud Myntri Rangbah ka jylla, Bah Prestone Tynsong u la ong ba ia ki restaurant kiba don ha ki surok bah yn ym pat shah satia ban plie.

Haba iadei pat bad ki skul, u Symbud Myntri Rangbah u la ong ba kim pat shim rai satia ei ei halor katei ka phang.

Ha kajuh u Myntri ka tnad ka Koit ka Khiah ka jylla, Bah AL Hek u la iathuh ba sa uwei pat u nongpang COVID u la koit bad mynta ka jingdon ki nongpang ka la poi sa tang 13 ngut.

La iathuh ruh ba tad haduh hynne ka sngi Balang ki la phah haduh 14,490 tylli ki sample ban test bad na kitei, kiba long negative ki long 14,086 tylli bad kiba dang ap ki long 360 tylli.

Nalorkata, u Bah Hek u la iathuh ruh ba ki la don baroh 16,100 ngut ki samla pule bad kiba trei shabar ka jylla kiba la wanphai tad haduh ka sngi Balang.