Naduh ka 16 tarik Risaw, ka sorkar kan nyn pynlut shuh ïa ka bai test: Prestone

Shillong, Risaw 6: Ka sorkar jylla ha ka sngi Ba-ar ka la rai ba naduh ka 16 tarik ki paidbah ba mut ban rung shapoh ka jylla ki hap ban siew hi ia ka bai test kaba ki hap ban leh ha shwa ban rung sha u pud u sam jong ka Meghalaya.


“Baroh kiba rung kynthup ia ki riew shimet ne ki nongkhaii ki hap ban da test shwa ha ki khyrdop ba la buh shwa ban rung tangba ia ka bai test da ka Antigen ki hap ban siew 500 tyngka,” ong u Symbud Myntri Rangbah ka jylla, Bah Prestone Tynsong haba  kren bad ki lad pathai khubor.


Nalorkata, u iathuh ba baroh ki paidbah kiba kwah ban leit test ki hap ban siew hi na pla. Katkum ka jingiathuh jong u, ka jingsiew na ka bynta ka RTPCR, CBNAT bad TrueNAT ka long 3200 marwei katba na ka bynta ka test Antigen pat ka long 500 tyngka.


Hynrei la pyntip ba na ka bynta kito kiba hap ha ka thup BPL ne kiba duk tam ha ka jylla kiba don ia ki card rashon kim donkam satia ban siew hynrei kin ioh ei. Katkum ka jingong jong u, na ka bynta kito ki high risk contact pat ia ka jingtest baroh yn tip hi da ka sorkar lyngba ka district survelliance team.


Kawei pat ka jingpynbna ka long ruh ba kito kiba sah ha ki corona care centre naduh ka 16tarik ki hap ban siew noh ia ka baibam miet la bad sngi. Hynrei la pyntip ba na bynta kito kiba kwah ban wanrah ja na sha iing la shah sngewbha ia ki.


U Bah Prestone u la ong ruh ba ia mynta hi ka sorkar kan ym pat shim ia ka bai sah ne ka bai kamra na ka bynta kito kiba sah ha ki corona care centre.


Ha kajuh ka por u la iathuh ba ka sorkar ka aiti ha ki DC ban ia kren bad ki trai jong ki hotel ne quest house na ka bynta ban pynkylla ia ki sha ki sha ki corona care centre.