Namar ka puja lum ka DC ïa ki kynhun niam bapher bapher

Shillong : Ka Deputy Commissioner ka East Khasi Hills hynne ka sngi ka la lum lut ia baroh ki kynhun niam ba don ha ka nongbah Shillong ryngkat ka jingdonlang u Superintendent of Police, ADC bad ki Sector
Magistrate kum shi bynta ban ia kren na ka bynta ka suk ka sain bad ka jingiaid beit iaid ryntih ka lehniam Puja.

Ha katei ka jingialang ki bor distrik ki la pan ruh ka jingiatrei lang na ki kynhun niam bapher bapher khnang ban pynneh ia ka shongsuk shongsain khamtam ha kum kane ka por lehniam Durga Puja.

Baroh ki kynhun niam haba kren ha katei ka jingialang ki la ai ka jingkhublei Puja sha ka Central Puja Committee bad ruh sha ki paid riewngeit Hindu baroh kiba don ha ka jylla.

Ha kane ka jingialang ladon lang ruh naduh ki nongmihkhmat na ka Central Puja
Committee, ka Shillong All Faiths Forum bad ruh ki nongmihkhmat na ki Muslim, Sikh, Khristan bad Seng Khasi Kmie.

La ioh ruh ia ka jingkren an u President ka Central Puja Committee, Naba Bhattacharya Bhattacharjee, nangta na u Rev. Fr. John Madur jong ka Shillong Archdiocese, Noor Nongrum, & Asst. General Secretary, Shillong Muslim Union, Rev GS Lytan, Presbyterian Church
of India, Rev R. Imiong, Church of God, Hammarsing Kharhmar, Seng Khasi Kmie, Gurcharan Singh, President SGSS Gurudwara, Raj Bhavan, JL Das, General Secretary, CPC bad Rev E Kharkongor, Secretary, Shillong All Faiths Forum

Na ka liang ka DC, Kong Isawanda Laloo pat ka la ai khublei ia baroh ki kynhun niam kiba lawan lang khrui ban ai lang ka jingkitbok na ka bynta ka lehniam Puja kaba iaid beit iaid ryntih.

Na ka liang u SP pat u la pyntip ba ki la pynbiang baroh ki jingpynkhreh khnang ba katei ka jinglehniam kan long kaba iaid beit.