Palat 25 snem la shakri u bah Lambok Thabah ha ka kam thoh khubor

Shillong, Nailur 22: U lyoh uba dum u la wan kah ïa ka shlem treikam jong ‘U Nongsaiñ Hima’ ha ka step sngi Ba-ar hadien ba ka khubor halor ka jingkhlad noh ba kyndit jong u ‘Editor’, i Bah Lambok Thabah, ka la wan poi.

I Bah Thabah i la khlad noh ha ka step sngi Ba-ar hashuwa ban poi ha Bethany Hospital, Shillong, hadien ka jingshitom kaba la ban kynsan-kynsan ïa i.   

La kha ïa i Bah Lambok Thabah ha ka 15 tarik u Jylliew 1971 ha ka shnong Umñiuh Tmar kaba don ha ka thaiñ Ri-War.

I la sdang ïa ka jingpule jong i ha kawei na ki skul shnong bad hadien kato-katne snem, i la leit noh sha sor Shillong ban bteng pat ïa ka jingpule ba shajrong jong i.

I Bah Thabah i la pynïasoh ha ka klas 7 ha St. Paul’s Seminary bad pyndep ruh ïa ka High School Leaving Certificate Examination (HSLC) ha u snem 1988.

Hadien kane, i la pynïasoh bad ka Shillong Polytechnic bad i pyndep ruh ïa ka jingpule ‘Mechanical Engineering’ ha u snem 1994.   

I Bah Thabah iba long u hymmen rangbah jong ki 6 ngut shipara i la ieh noh shadien ïa la i kurim, Kong Mildred Sun bad 3 ngut ki khun.

I Bah Thabah i la don bynta bad ‘U Nongsaiñ Hima’ naduh u snem 1996-1997.

Ha kajuh ka por, i la shimti kum u ‘Editor’ jong ka kotkhubor ha u snem 2003 bad i la bat ïa kane ka kam haduh ki sngi ba khatduh jong i.

Nalor katei, i Bah Thabah i la iadon bynta lang ruh bad kiwei-kiwei ki kot khubor Khasi bad phareng kiba don hapoh Meghalaya.

Kumban shu pynkynmaw, i Bah Thabah i la long ruh u nongthoh khubor uba nyngkong eh hapoh ka jylla ban ïoh pdiang ïa kawei na ki khusnam bakhraw hapoh Ri India ïa kaba la tip kum ka ‘Ramnath Goenka Excellence In Journalism Awards’.

Ia katei ka khusnam la aiti ha i da ka Lamphang barim ka iingdorbar Lok Sabha, ka Sumitra Mahajan ha u snem 2014.

Ha kaba ïadei bad ka jingkhlad noh jong i Bah Thabah, na ka liang u Myntri Rangbah ka jylla, u Conrad K. Sangma u la phah ïa ka kyrwoh sngewlem sha ki bahaiing hasem jong i. Ha kajuh ka por, ki la don ruh sa kiwei-kiwei kiba la pynpaw ïa ka jingsngewlem halor ka jingkhlad noh jong utei u nongthoh khubor.

Na ka liang ka Shillong Press Club bad ka ophis ‘U Nongsaiñ Hima’ hynne ka sngi ki la pynlong ia ka jingïalang sngewlem kum ka dak ban kynmaw burom ïa utei u rangbah.

Ia ka met kaba sah jong i Bah Thabah yn tep don burom ha u Lum jingtep ka Balang Katholik ha Mawlai Mawdatbaki, Pata ha ka sngi Palei.

Ka jingduh noh ïa une u radbah ha ki kam thoh khubor, uba long ruh u rishot ba skhem jong ‘U Nongsaiñ Hima’ ka la pynkthang shi kat dei ïa ka ophis baroh kawei naba kan eh shibun ban pyndap pat ïa ka jaka ba thylli kaba utei u rangbah u la ieh noh shadien.

Na ka liang ka ophis kan ïai kynmaw bad pyrto jam ïa ki jingsynñiang jong i Bah Thabah ha ki kam thoh khubor.