Pat ïoh mih u Champion Sangma na along, thmu ki pulit ban kem biang ïa u

Shillong, Lber 22: U Chairman ka Garo National Liberation Army (GNLA) Champion Sangma uba la dei ban mih noh na along hadien ba ka ïingbishar Supreme Court ka la bthah ïa ka sorkar jylla ban pyllait noh ïa u hynrei utei u nongïalam katei ka seng lehnoh haduh hynne ka sngi um pat lait satia.

Ïa katei ka hukum la pynmih dang ha kine ki khyndiat sngi da ka ïingkashari jong u Justice AK Sikri bad Justice Ashok Bhushan kaba la kyntait sharud ïa ka hukum bala pynmih da u Additional District Magistrate (Judicïal) ba ailad ïa u nongïasaid ka Sorkar ban ai da ka jingthoh (application) ban pyrshah ïa ka jingpyllait noh ïa u Champion na along.

Katkum ka jingïathuh jong ka bor sorkar jylla, la ïathuh ba u Champion u lah ban lait noh ha ki khyndiat sngi kata hadien ynda ki nongïasaid aiñ jong u, ki lah ban phah ïa ka kopi jong ka hukum kaba la pynmih na ka ïingbishar Supreme Court.

U nongïasaid aiñ jong u Champion, u Sujit Dey u la ïathuh, “Ba ka kynhun jong u ka ladep ban phah ïa ka hukum jong ka ïingbishar sha ka sorkar bad ki dang ap ïa ka jubab haba ïadei bad katei ka mat.”

Hynne ka sngi katba ki nongïasaid aiñ ki dang ap ïa ka rai jong ka sorkar ba kan pynmih haba ïadei bad ka hukum ka ïingbishar Supreme Court, hakhmat ka Shillong Jail ki pulit ka nongbah ki la syrtap ha ka jingthmu ban kem biang ïa u lada u mih na along.

Haba pyrshang ban wad jingtip, la lah ban sngewthuh ba ki pulit kin kem ïa u Champion namarba ka dang don sa kawei ka case kaba sah.

Hynrei ha kawei ka liang, mynta ka sngi, ki pulit ka Shillong Jail ki la rah ïa u Champion sha ka Shillong District Court ha kaba ïadei bad ka case kaba la registar hapoh Pynursla P, kaba u ladep ban ïoh jamin.

Haba ïoh ban ïakren halor ka hukum jong ka Supreme Court bad u myntri ka tnat kam pohiing ka Jylla, James Sangma u la ong, “Ngi burom ïa ka rai ka ïingkashari tangba ka sorkar kan sa shong ban bishar biang haba ïadei bad katei ka case.”

U James u la ong pat, ka sorkar ka ieng pat ha ka nongrim ban ïakhun pyrshah ïa ki kam pyntriem jong ki seng lehnoh bad ban nym khot ïakren lada ki seng ki dang bteng ban kieng atiar, u la bynrap.

U Champion Sangma u la shah kem ha u snem 2012 na khappud jong ka India bad Bangladesh bad ha along u la don mynta kumba 5 snem shiteng.