Pat lah rai ka sorkar ban plie ïa ka Ïewduh bad Khyndailad

Shillong, Jymmang 25 : Ka review meeting jong ka sorkar jylla kaba long ha ka sngi Nyngkong kam pat shim satia ïa ka rai na ka bynta ban plie noh ïa ka Ïewduh kumjuh ia ka Khyndailad wat la ka jingdawa ban plie noh ia kitei ki jaka long Ïew ka la jur bha.

Haba pyntip ïa kane, u Symbud Myntri Rangbah, bah Prestone Tynsong u la ong ba ia mynta hi kim pat lah ban shim rai namar kim pat ïoh satia ïa ka kaiphod kaba pura la ka long na ki bor Distrik, SP, Hima Mylliem bad kumjuh ruh na ka KHADC.

“Tangba ha kawei ka sngi ngin hap beit ban plie namar don bun kiba shaniah ha ki dukan bad ki ïew ki hat na ka bynta ban pyndap ia ka ïing ka sem,” u la ong.

Shuh shuh, u la ong ruh ba lada plie ïa kitei ki jaka ïew ka shong ha ka jingkitkhlieh jong ki paidbah ban bud ïa kitei ki kyndon ban ïada ïalade khamtam katkum ki jingbthah ba la pynmih da ka sorkar.