Phah ka Ri Bhoi Distrik da ki durkhmat kiba thymmai ban long kum ki nongthawaiñ sha ka ïingdorbar

  • Shillongmail
  • March 10, 2018
  • Comments Off on Phah ka Ri Bhoi Distrik da ki durkhmat kiba thymmai ban long kum ki nongthawaiñ sha ka ïingdorbar
Ki Myntri Rangbah Jylla barim jong ka Jyllla – Dr. DD Lapang, bah EK Mawlong (ba la khlad noh) bad bah JD Rymbai.

 

Shillong, Lber 10: Ka thaiñ Ri Bhoi kaba dei kawei na ki distrik kaba la ïoh ban don haduh lai ngut ki myntri rangbah ha ki sorkar bapher bapher hadien ba ka Jylla Meghalaya ka la ïoh a ka jylla kaba pura ha u snem 1972, ha kane ka ilekshon kaba dang shu dep long hapoh ka ïingdorbar thawaiñ kaba 10, ki paidbah katei ka distrik ki la phah da san ngut ki riewkhmat kiba thymmai ban long kum ki nongthawaiñ.

Kine ki nongthawaiñ kiba dang dei ki riewkhmat kiba dang thymmai kidei ruh kiba dang khynnah ha ka rta lada ïa nujor bad kiwei pat kita ki nongthawaiñ lane ki Member of Legislative Assembly jong ka Meghalaya Assembly.

Ka Ri Bhoi distrik ka don san tylli ki konstitwensi – ka 8-Mawhati, 9-Nongpoh, 10-Jirang, 11 -Umsning bad ka 12-Umroi.

Napdeng kitei ki san tylli ki konstitwensi, ka 11-Umsning kadei ka konstitwensi kaba dang shu mih thymmai ha u snem 2013 hadien ba la phiah na ki saw tylli ki konstitwensi kiba ladon lypa.

Ha ki por mynshuwa kata hashuwa ba ki paidbah kin phah da ki riewkhmat kiba thymmai, ka Ri Bhoi ka la paw ha ka jingïoh ïa lai ngut ki Myntri Rangbah kiba kynthup ïa u Dr. DD Lapang, bah EK Mawlong uba la khlad noh bad bah JD Rymbai.

U Dr. Lapang udei uba la mihkhmat ïa ka Nongpoh konstitwensi, bah EK Mawlong ïa ka Umroi konstitwensi bad bah JD Rymbai ïa ka Jirang.

Ka jinglong myntri rangbah jong u Dr. Donwa Dethwelson Lapang ka long haduh san sien – (5 Rymphang, 1992 – 19 Rymphang, 1993) (4 Lber, 2003 – 15 Jylliew, 2006) (10 Lber, 2007 – 4 Lber, 2008) (4 Lber, 2007 – 19 Lber, 2008) (13 Jymmang, 2009 – 19 Ïaiong, 2010).

Katba u bah Evansius K. Mawlong ka long naduh 8 Lber, 2000 – 8 Nohprah, 2001 bad u bah J. Dringwell Rymbai naduh 15 Jylliew, 2006 – 10 Lber, 2007.

Ha kane ka ilekshon kaba dang shu dep ban long ha ka 27 tarik Rymphang mynta u snem, ki paidbah ki la phah bad pynmih bujli da ki samla rangbah ha ka jaka jong ki MLA kiba la mihkhmat ïa kitei ki san tylli ki konstitwensi lait noh tang ka Nongpoh kaba u Dr Lapang u la rai ban shongthait noh ban ïakhun ïa ka ilekshon.

Ki MLA kiba mynta jong ka Ri Bhoi Distrik – Sosthenes Sohtun (Jirang), Mayralborn Syiem (Nongpoh), Dasakhiat Lamare (Mawhati), Jason Mawlong (Umsning) bad George B. Lyngdoh (Umroi).

 

Na Nongpoh la mih bujli da u bah Mayralborn Syiem uba la mih bujli ha ka jaka u Dr DD Lapang bad udei uba mihkhmat na ka seng Congress.

Ïa ka Jirang la ïoh ban mihkhmat da u bah Sosthenes Sohtun na ka seng National People’s Party (NPP), ïa ka Mawhati da u samla Dasakhiat Lamare na ka NPP, na Umroi da u bah George B. Lyngdoh na ka Congress bad na Umsning da u bah Jason Mawlong na ka People’s Democratic Front (PDF).

Ha ka jingïoh ban ïakren bad kine ki MLA kiba thymmai kiba la shah pyntian smai ha ka 7 tarik Lber ha ïingdorbar thawaiñ ha u Lamphang ba shipor (Protem Speaker), jan baroh ki phaikhmat bad angnud ban wanrah ïa ka jingkylla hapoh ka konstitwensi.

Ka Ri Bhoi distrik kaba dang shu dap 25 snem ha ka jingïoh distrik kata ha ka 4 tarik jong u bnai Jylliew, 2017 kadei kawei na ki distrik kaba dang sahdien khamtam eh bad ka jingbym pat biang ki surok.

Hashuwa ba ka Ri Bhoi kan ïoh ïa ka distrik kaba pura ha u snem 1992, ha katei ka thaiñ la don saw tylli ki konstitwensi bad ha ka sien kaba nyngkong ki nongmihkhmat katei ka thaiñ ki kynthup ïa u bah D.D. Lapang na Nongpoh, na Umroi u bah Dlosing Lyngdoh (ba la khlad noh), Mawhati da u bah Martin Narayan Majaw (ba la khlad noh) bad ïa ka Jirang da u bah Hoover Hynniewta (ba la khlad noh).

Haba ïoh ban ïakren bad u Dr. DD Lapang uba long u nongmihkhmat uba nyngkong jong ka Ri Bhoi bad uba don mynta 84 snem ka rta, u la pynsngew ïa ka jingangnud kaba u don na kine ki nongmihkhmat kiba thymmai ba u kwah ba kin long ki briew kiba don ka jingkitkhlieh bad ban don ka jingïaid ïa ki paidbah katei ka thaiñ.

“Ngam kwah ba ki paidbah kin shah iehnoh khunswet hynrei kidei ban ïoh ïa ka hok jong ki katkum kaba ka sorkar ka la mang lyngba ki skhim bapher bapher,” ong u Dr Lapang uba la mihkhmat ïa ka Nongpoh haduh phra sien.

Nalorkata u la ong, ka jingdon ki nongmihkhmat kiba dang samla kam i don ban ong, ba ka Ri Bhoi ka duh jingkyrmen hynrei baroh ka shong ha ka jingstad treikam.

Haba kylli, kiei kiba ka Ri Bhoi ka dang donkam ban ïohpdiang na ka Sorkar, u Dr Lapang u la ong, lada kheiñ kyllum ki jingdonkam kiba bun hynrei ki jingdawa ki wan ruh katkum ka por tangba kaba hakhmat eh kadei ban don ka surok, ki jaka pule, ki jaka ai jingsumar kiba biang, ki lad ban ai kam ai jam bad kiwei kiwei.

Shuh shuh u Dr. Lapang u la ong, ba kum u nongmihkhmat banyngkong jong ka distrik u kloi ban ai ka jingïarap lada kine ki nongmihkhmat kiba thymmai ki wan ban mih bad lada ki wan pan jingïarap.