Puk tur ki paidbah haduh phyllaw ka Secretariat

Kmen ki paidbah ba kular ban pyni paidbah ïa ka durkhmat jong ki harijan ba shah kem… Kyntait u MR

Shillong, Jylliew 04: Ki paidbah kiba na kylleng ki jaka kum na ki thaiñ Mawlai, Mawkhar, Jaïaw, Wahiingdoh bad Mawprem hynne ka sngi ki la tur paidbah sha ka Secretariat kaba la pynkyndit ïa uba bun balang khamtam eh ïa ki pulit, kiba khlem lah ban pynsangeh ïa ki namar ki la ïoh ban rung haduh ka phyllaw jong katei ka ophis treikam kaba shong ki myntri sorkar bad ki ophisar rangbah.

Kine ki paidbah kiba lawan ha ka sur jong u paidbah ki lawan lyngba ka Polo na Jaïaw bad ïaid ter ter lyngba ka ophis u Deputy Commissioner bad haduh ban da ioh rung ha Secretariat.

Ka jingioh wan kine ki paidbah ka la pynkyndit ïa ki nongap pahara ka Secretariat namar ki la ioh ban rung bad ban plie ïa ka khyrdop kaba la khang tala.

Hashuwa ban ioh rung ha Secretariat, kine ki paidbah ki la pyrta haryngkat ki jingdawa, ba dei ban pynkynriah noh ïa ki harijan kiba sah ha Them Ïewmawlong, ban kem ïa kito kiba shoh ïa ki lai ngut ki khynnah bad ban pyni ïa ka dur jong kito kiba la shah kem ha ki lad pathai khubor, bad kiwei kiwei ki mat.

Hadien ba la ioh ban rung hapoh, ki bor pyniaid distrik ki la mana ïa ki ban shong ha ka phyllaw jong ka secretariat hynrei napdeng kitei ki paidbah, kiba bun ki la dawa ba ki kwah ban kynduh ïa u myntri rangbah namarba ki don ki mat jingdawa ban aiti ha u.

Mar mar kumta, ki bor pyniaid distrik ki la pynbeit bad ban ailad ïa san ngut ban rung shapoh, kumta hadien ka jingioh lad, kumba san ngut kynthup ki longkmie ki la rung shapoh bad ban shong jingialang haduh kumba shi kynta duna.

Hadien ynda lamih na ka jingiakren bad u myntri rangbah, uwei na kiba la iohrung shapoh, u la pynsngew ha ki paidbah ba ka jingiakren ka long kaba seisoh bad ba u myntri rangbah u la kular ban leh mardor ia ka jingdawa jong ki.

Une u rangbah u la ong, u myntri rangbah u la kular ban sa pyni paidbah ïa ka dur jong uba la shah kem ha ki lad pathai khubor mynta ka janmiet bad ha kaba ïadei bad ka jingpynkynriah ïa ki harijan, la kular ba ka sorkar ka la thaw ïa ka komiti bad ban shong iakren bad ka Hima Mylliem, ka KHADC bad ki ophisar sorkar ha kaba iadei kumno ban pynbiang ia ki kot ki sla.

Mar ia pynsngew ïa kine ki jingkular, ki paidbah ki la ia thap kti bad mynjur ban leit phai noh da kaba suk sha la iing haryngkat ka jingpyrta pat ba kin ap khmih lynti ia ki kular u myntri rangbah bad lada kam urlong, kim banse ban mih paidbah biang sa shisien.

Namarba ka ladei ka curfew kaba la pynjari ha baroh ki jaka ha nongbah, ïa kitei ki paidbah la leit ban on da ki pulit haduh ki jaka kiba ki sah.

Ha ka jingioh iakren bad u myntri rangbah, u Conrad Sangma u la ong, ba ha ka jingiakren, u khlem ai kano kano ka jingkular ban pyni paidbah ia ka dur jong u harijan uba la shah kem ha ka jingdonkti ban shoh ïa ki khynnah.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589