Pulom ka jingthmu shna Police Outpost ka sorkar Assam ha Umru, Ri Bhoi Distrik

Nongpoh, Lber 20: Ka sorkar Assam sa shisien ka la sdang ban wan kyntur pud ïa ki jaka kiba hap hapoh ka jylla Meghalaya hynrei kane ka jingthmu jong ki, ka la pulom biang hadien ka jingtuklar jong u Deputy Commissioner ka Ri Bhoi distrik, u CP Gotmare.

Ka Assam ka lawan ban kyntur pud da ka jingthmu ban buh ïa ka Police Outpost ha ka shnong Umru kaba hap hapoh jong ka Raid Nongtung, Block II jong ka Ri Bhoi District.

Ka jingpynlong ïa ka sorkar Assam ban pynsangeh noh kadei na ka jingtuklar pynsted jong u Deputy Commissioner ka Ri Bhoi, u CP Gotmare.

U Gotmare hadien ka jingioh jingtip halor kane ka jingthmu jong ka sorkar Assam ban buh ia ka outpost ha katei ka shnong, u la iakren bad ai ruh da ka jingthoh sha u DC jong ka Karbi Anglong ha ka sngi Baar na ka bynta ban pynsangeh shwa ia katei ka jingtei katba ym pat lah ban pynbeit pat da kumwei.

Kum ban shu pynkynmaw, ka jingthmu jong ka sorkar Assam ban buh ia ka Police Outpost ha katei ka shnong Umru kadei naduh ki snem kiba mynshwa ha kaba ka mih ruh ka jingpyrshah na ki ba bun ki paidbah nongshong shnong jong ka Raid Nongtung kaba hap ha Block II bad ruh ka jingpyrshah na ki sengbhalang ba kynthup ia ka Khasi Students Union, ka Hynniewtrep Youth Council bad kiwei kiwei na ka por sha ka por.

Halor kane ka juh ka bynta, na ka liang ka HYC ka lah dep ruh ban ai da ka dorkhas sha u chief minister barim ka jylla, u Dr Mukul Sangma na bynta ban tuklar lem ia katei ka jingthmu ha u snem u ba lah dep, hynrei ym lah ban tip na kiei kidaw ba la pynlong ia ka sorkar Assam ban iai pyrshang rung sha ki jaka kiba dang hap hapoh u pud u sam jong ka jylla.