Pynbna ka seng Congress ïa ka jingïakhih ban pyrshah ai Work Permit sha ki nong Bangladesh

  • Shillongmail
  • April 12, 2018
  • Comments Off on Pynbna ka seng Congress ïa ka jingïakhih ban pyrshah ai Work Permit sha ki nong Bangladesh

Shillong, Ïaïong 12: Ka liang pyrshah hapoh ka jylla, ka seng Congress mynta ka sngi ka la pynban ba kan sdang da ka jingïakhih pyrshah ïa ka jingthmu ka sorkar Meghalaya Democratic Alliance (MDA) kaba la leit ban tyrwa ai work permit sha ki nong Bangladesh.

Haba kren sha ki lad pathai khubor hapoh Congress Bhavan, u nongïalam ka liang pyrshah opposition leader in the Meghalaya Assembly, u Dr Mukul Sangma u la ong, ba ka seng Congress kan ïakhih ban pyrshah ïa ka jingthmu ka sorkar kaba lamkhmat daka NPP ban ai work permit sha ki nong Bangladesh.

“Ka seng da lei lei kan nym shah ïa ka sorkar ba kan ai work permit sha ki nong Bangladesh,” ong u myntri rangbah barim ka jylla.

U Dr Mukul u la ong, kane ka jingïakhih ban pyrshah ïa ka jingthmu ka sorkar kan sdang naduh ka sngi Saitjaiñ bad kane kan long ha Shillong bad Mendipathar.

U myntri rangbah barim ka jylla u la ong ruh ba kin pan ka jingkyrshan na ki paidbah ka jylla haba ïadei bad kane ka mat.

U Dr Mukul u la pyntip ba un ïalam ïa jingïakhih ha Mendipathar bad kiwei ki nongïalam ka party pat kin ïakhih ha nongbah Shillong.

“Ngim hun bad ka jingpynshai kaba la ong, kane ka jingthmu ka long ban kyntiew ïa ka kam khaïi hapoh ka jylla,” ong u Dr. Mukul.

U la ong ruh ba u dap da ka jinglyngngoh ba u myntri rangbah un kam, ba kane ka jingtyrwa kadei na ka bynta ba ki paidbah ka jylla kin biang ha ka ïoh ka kot.