Pynjari korphiw ka sorkar ha khappud Riwar Pynursla bad Bangladesh

Shillong, Jymmang 8: Ka sorkar Meghalaya ha ka sngi Thohdieng ka la pynjari da ka korphiw miet ha shi lynter ka khappud jong ka Pynursla Civil Sub Division bad ka Bangladesh naduh ka por 8 baje mynmiet haduh ka por 6 baje mynstep ban khanglad ïa ka jingkynduh ne ka khaii pateng hapdeng ki nongshong shnong na katei ka thaiñ bad ka ri ba marjan.

Katei ka korphiw kan treikam naduh ka miet sngi Thohdieng tad haduh ka 31 tarik mynta u bnai. Ka jingpynbna na u SDO jong ka Pynursla Civil Sub-Division ka ong ruh ba ki jaka ba katei ka korphiw kan treikam kan long 5 kilometer na u mawpud 1251 -1272.

Ïa katei ka rai, ka sorkar ka shim hadien ba ka la don ka jingud na ki nongsynshar shnong jong ki shnong ba don ha khappud bad ka Bangladesh wat ha kane ka por ba ka Meghalaya kumjuh ka Bangladesh ki don ha ka jingïakhun kaba jur bha pyrshah ïa u COVID-19.

 Na ka liang u Symbud Myntri Rangbah ka jylla, ba dei ruh u MLA ka thaiñ bah Prestone Tynsong ha kane ka sngi Thohdieng u la lum da ka jingialang ïa baroh ki heh sorkar jong ka distrik kynthup naduh ka SP jong ka East Khasi Hills, nangta u SDO jong ka Pynursla Civil Sub Division, baroh ki BDO, ki Medical Officer jong ka East Khasi Hills bad kiwei kiwei ki ophisar jong kiwei ki tnad ban ia syllok bad phylliew jingmut lang bad kitei ki nongsynshar shnong na ki 24 tylli ki shnong khappud kumno ban khanglad ïa ka jingphriang jong u COVID 19.

Katkum ka jingiathuh jong ki Sirdar, kynthup naduh u Sirdar ka Raid Lyngkhat, Sirdar ka Elaka Nongjri bad Rangbah Shnong ka Umsyiem ki la iathuh ba ha katei ka jingialang ki la dep ruh ban pynpaw ïa bun ki jingeh ba kum ki shnong ki kynduh khamtam eh ban khanglad ia ka jingioh rung ki briew na Bangladesh ha kum kane ka por ba ka jingpang ka sdang ban phriang khylleng.

Na ka liang u Symbud myntri Rangbah pat u la ong ba nalor ka jingpynjari korphiw, ki la rai ruh ban pynkhlain shuh shuh ïa ka jingpahara khappud khnang ban pyntikna ba kan ym don shuh ka jingia kynduh ne ka leit ka wan hapdeng ki paidbah na katei ka thaiñ bad ki paidbah na Bangaldesh kumba ki ju leh bararbor.

U la ong ruh ba ka sorkar ka pynkhreh wat ban buh noh da ki home-guard khnang ban pynjur shuh shuh ïa ka jingpahara ha kitei ki khappud ban khanglad syndon ia ki paidbah ba kin ym tur shuh sha khappud na ka bynta ban leh ia ki kam khaii pateng ne kino kino ki kam khaïi beaiñ.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589