Pynkynriah ia ka jaka test COVID-19 na Khyndai Lad: Adelbert

Shillong, Nailur  04: U Bah Adelbert Nongrum, MLA ka Khun Hynniewtrep National Awakening Movement (KHNAM) na North Shillong u la kyntu ia ka Sorkar Jylla ban pynkynriah ia ka jaka test COVID-19 naphang ( COVID-19 Random Sampling Testing Centre) na Khyndai Lad sha ka jaka kaba don ha pyrshah ka State Bank of India, Main Branch. 

Ia kane une u nongmihkhmat u la pynpaw hadien ka jingwan jurip bad ia mir jingmut bad ki nongialam ki COVID-19 Management Committee na Khyndai Lad, Oakland bad Jail Road ha ka nohphai Sngi Thohdieng. “Nga la ia kren bad kine ki nongialam ha kaba ki la pynsngew ba dei ban pynkynriah ia katei ka jaka test COVID-19 namar ka jingkhapngiah”, u la ong.

“Ngan nym kdew ia ka jingduna hynrei ngan kdew ia ka jingbym shim jingmut bad ai jingïatreilang ka Sorkar ia nga kum u nongmihkhmat kane ka thaiñ shwa ban buh ia kane ka Centre. Na ki jingiakren bad ki nongialam na kine ki lai dong, nga sngewthuh ba ka jingsaphriang paidbah kane ka jingpang ka la don”, u la ong.

“Tang na Jail Road baroh ki la don 20 ngut tam bad 3 ngut na Oakland bad ka long ka jingma ia ki nongshong shnong. Mano mano ym dei ban pynksan bad kiba pynksan kin hap shim ka jingkitkhlieh”, u la ong da kaba pynpaw ba ka jingwan ia kynduh bad ia mir jingmut ka long namar ba ka jingsngewkhia ba kane ka jingpang ka la nang saphriang kat nang mih ki sngi.

“Dang shen u Myntri Rangbah, Conrad K Sangma u la lum ka jingialang bad ki MLA na East Khasi Hills bad la ong ba ki MLA kin lam khmat ia ki COVID-19 Management Committee na ki Constituency hynrei haduh mynta kam pat don kano kano ka jingtrei kam”, u la ong. “Nga la kren ha ka jingialang ba ki don kiba ïoh COVID-19 na Raj Tilak hotel hynrei ka Sorkar kam shym leh eiei bad kheiñ sting”.

“Mano ban shim jingkitkhlieh bad dei ban pynkynriah ia ka Quarantine Centre na Roop Rekha namar ka don hapdeng ka jaka iew bad jaka paidbah bad kan buh jingeh”, u la ong. “Nga kyntu ia ka Sorkar ruh ba kan ym pynshlur ia kiba ïoh COVID-19 ba kin sumar set kut ialade ha ki Ïing khlem da peit bniah la ka biang ne em na ka bynta jong ki”, u la ong.

“Kan long ka jingeh lada ki iing ki don tang ar kamra ne lai kamra bad yn ym lah ban teh lakam ia ka jingma na ka jinglah ban saphriang shuh shuh kane ka jingpang COVID-19” u la ong.