Pyrshah ka Mawlai Town Dorbar ïa ka rai pynpoi kyiad haduh tyngkong ïing

Shillong, Nailar 28: Ka Mawlai Town Dorbar ka la wan sha khmat ban pynpaw ia ka jingsngew pyrshah jong ka halor ka aiñ thymmai ka Sorkar Jylla ban pynpoi kyiad haduh tyngkong iing.

Ha ka 07 tarik u Nailar, 2020, ka jingialang ka Kynhun Myntri ka la mynjur ia ka jingtyrwa ban ai license sha ki dukan kyiad ba kin lah ban pynpoi kyiad haduh ha ki iing briew hapoh ka Meghalaya Excise Rules.

U Bah SD Khongwir, Chairman ka Mawlai TD u la ong ba naduh kaba sdang ki la sngew don beit ka jingpyrshah. “Ngi la ia twad jingmut bad ka Mawlai hi baroh kawei ka pyrshah ia kane bad ngi shim ia ka sur uba bun balang”, u la ong.

“Na ka liang ka Mawlai Town Dorbar ngi la rai ruh ba ym dei ban don ‘wine store’ ha Mawlai. Ki la don kiba la pyrshang pynkham pisa ban ïoh buh ‘wine store’ hynrei ka dei ka rai jong ka Mawlai Town Dorbar ban ym shah da lei lei ruh”, u la iathuh.

Haba kylli, ula ong, “Nga la ia kren bad u Myntri ka tnad Excise bad nga la ong sngewbha ba ia kane ka rai hap ban peit bniah bad hap shim da ka jingsngewthuh jingmu. Ka Sorkar ka dei ban ai jingïatreilang bad lada kam ai jingïatreilang ngi ruh ngin nym ai jingïatreilang”.

Da kaba iathuh ba kan don ka jingiakren bad ki bor pyniaid District, u la ong, “Ia kiwei ngim tuklar hynrei ym dei ban pynpoi kyiad sha ki longïing ha Mawlai. Ai kan mih da ka jingthoh na ka bor pynïaid District”, u la ong.

“Nga la dep ong ba ka dei ban don ka jingïatreilang bad phi ïohi ha ka jingiakhun pyrshah ia ka khlam COVID-19 kaei kaba ki Dorbar Shnong ki la leh bad ka Sorkar hi kan ym lah ban leh eiei khlem ki bor pyniaid shnong bad ngin ia kren bad ki bor pyniaid District”, la ong u Bah SD Khongwir.