Rai ka sorkar ban khang dam shuwa ïa ki shnong kiba ha khappud bad ka Assam

Shillong, Jylliew 29: Ka sorkar jylla ha ka sngi Nyngkong ka la rai ban khangdam shwa shipor naduh 30 tarik mynta u bnai ia ki shnong ba don ha khappud bad ka Assam kiba hap ha Ri Bhoi District na ka daw ka jingnang kiew u COVID -19 ha ka jylla Assam kaba dei ka jylla kaba marjan tam bad ka Meghalaya.

“Naduh la shai, ka jingplie ia ki dukan na Byrnihat shaduh Rani ha shi lynter ka khappud bad ka Asam kin khanglut tad haduh ka 15tarik u Naitung. La dep bthah ruh ia ki Deputy Commissioner jong ka Ri Bhoi District ban pyntreikam ia kitei ki kyndon,” ong u Symbud Myntri Rangbah ka Jylla, Bah Prestone Tynsong haba kren bad ki lad pathai khubor ha ka janmiet sngi Nyngkong.

La ong ruh ba katei ka sienjam ka long ban pyntikna ba yn ym don ki nongshong shnong ka Assam ban rung sha ka Meghalaya.

Ha kajuh ka por la iathuh ruh ba ha ka review meeting kaba long ha katei ka sngi la rai ruh ban ka jingphah ia ki shipai, ki nongtrei bank bad ki nongtrei ha ki tnad jong ka sorkar pdeng dei ban sangeh shwa ia mynta shipor katba ka jinglong jingman halor u COVID ka dang kiew.  

Kumban shu kdew hangne, ki don haduh lai ngut ki shipai, kata arngut ki BSF bad uwei na ka Assam Regiment kiba la ioh ia utei u khniang jingpang.  

Ha kajuh ka por, u Bah Prestone u ong ruh ba ka jingwan ki nongshong shnong ka jylla na kylleng ki bynta jong ka ri India kan bteng haduh ka 15 tarik u Naitung.

Ha kajuh ka por, u Myntri ka tnad ka Koit ka Khiah, Bah AL Hek u la pyntp ba haduh mynta, ki la phah haduh 19287 tylli ki samle bad na kine 18657 ki long negative bad kiba ap mynta ia ka report ki long  580 tylli.