Sa arngut ïoh COVID-19 ka jylla : Kyntu u CM ban ym rit mynsiem

Shillong, Jylliew 02 : Ka Meghalaya ha ka jansmiet sngi Baar ka la ioh thymmai biang sa ar ngut ki briew kiba ioh ia u khniang jingpang coronavirus. Kitei ki arngut kiba dei na rilum Garo kidei kiba dang wanphai na Uttar Pradesh.

Katkum ka jingpyntip na u Myntri Rangbah la ong ba ktiei ki arngut ki don mynta ha ka quarantine centre ha Chibinang, West Garo Hills. Kumba long mynta, ki la don haduh 17 ngut ki briew kiba don ia utei u khñiang jingpang kiba dang don mynta ha kylleng ki jaka sah ha ka jylla.

Ha kawei pat ka liang, na ka liang u Myntri Rangbah ha ka jingialang bad ki ophisar jong ka East Garo Hills hynne ka sngi u la kyntu jur ïa ki heh sorkar kumjuh ïa ki paidbah ba kim dei satia ban tieng lada ka jingdon kiba ioh ïa utei u khñiang jingpang COVID-19 u nang kiew ha ka jylla.

“Ha kine ki khyndiat sngi khyndiat taïew kan ym dei satïa kaba suk ïangi namar kiba bun ki nongshong shnong ka jylla kiba dang sahkut shabar jylla kin wanphai ïing. Ngi hap ban long kiba peitngor bad ban ym rit mynsiem lada jia ba dang don kiba ioh thymmai biang ïa utei u khñiang jingpang,” ong u Myntri Rangbah ha ka jingïalang bad ki heh sorkar jong ka East Garo Hills ryngkat ka jingdonlang ki ophisar ka tnad ka Koit ka Khiah.

Ha kajuh ka por u la kyntu ruh ïa ki bor distrik ba kidei ban peitngor bad ïada ïa ki nongshong shnong kiba la palat 60 snem ka rta nalor ba ki hap ruh ban pynkhreh lada don kano kano ka jingpynkylla thymmai hadien ba la kut ka jingkhangdam ïa ka jylla.

Nalorkata, u ong ruh ba ka jingkyntiew ïa ka jingdonkam ha ki jaka ai jingsumar kadei kaba hakhmat eh bad kumta u la pyntip ba ïa ki kali kit nongpang yn sa pynbiang ha kylleng ki jaka ai jingsumar kiba don ha ka jylla.

Ha kane ka sngi u la leit ruh ban jurip ïa ka Civil Hospital, Williamnagar. Ha Tura pat, u Myntri Rangbah u la leit ban jurip ïa bun tylli ki quarantine centre ba la pynkhreh da ki shnong bad ban syllok ruh bad kiba bun ki paidbah kiba sah ha kitei ki centre kynthup ha Matchakolgre, Rongkhon, Araimile, Jerusalem bad Te’teng Aja.

U Myntri Rangbah ka jylla, Conrad K Sangma u la leit ban jngoh ruh ïa ka jingpynkhreh jong ka East Garo Hills haba iadei bad ka jingiakhun ia u coronavirus bad hadien kane pat u la leit ruh ban jurip ïa ka quarantine centre kaba don ha Williamnagar.

Ha kane ka sngi u la ia syllok bad phylliew jingmut ruh bad kito ki ba sah ha kitei ki qurantine centre bad ai mynsiem ruh ïa ki ba ki dei ban bud pyrkhing ïa ki kyndon ba la buh da ka sorkar namar kadei na ka bynta ka bha ka miat jong ki hi.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589