Sangeh ka bam dohsniang, kyntu u Symbud Myntri Rangbah

Shillong, Nailar 3: Ka sorkar jylla ha ka sngi Nyngkong ka la shim ia ka rai ban bthah ia ki nongshong shnong jong ka Lamin bad ki jaka ba marjan ban ym pat pyniap sniang lane bam dohsniang katba ym pat ioh ia ka report na ka North Eastern Regional Disease Diagnostic Laboratory, Khanapara halor ka jingiap ki sniang ha katei ka shnong.

Haba kren bad ki lad pathai khubor hynne ka sngi, u Symbud Myntri Rangbah ka Jylla, Bah Prestone Tynsong u la ong ba katei ka jingbthah kaba ki ai kadei hadien ba ki don haduh 15 tylli ki sniang na katei ka shnong kiba la iap ha u bnai ba la dep. Kumta halor kane, na ka liang ka tnad Veterinary jong ka sorkar jylla mardor ki la shim ia ka sample jong ki 6tylli ki sniang ban phah test pat sha Khanapara.

Katkum ka jingong jong u, tad haduh mynta kim pat lah satia ban tip ia ka daw jong ka jingiap jong kitei ki sniang lane la ka jingpang kaba ki ioh.

U la ong ruh katba ym pat ioh ia ka report na katei ka Laboratory kin ym pat lah ban ong ka jingiap jong ki sniang kadei na ka African Swine Fever ne kadei na kiwei pat ki jingpang.