Sdang biang ka Dorbar Mangtyngka jong ka Ïing Dorbar Thawaiñ ka Jylla

Shillong, Jymmang 20: Ka Dorbar Mangtyngka jongka Ïing Dorbar Thawaiñ ka jylla ka la bteng biang ia ka Dorbar Mangtyngka na ka bynta ka snem 2020-2021 wat hapdeng ka jingkhangdam ia ka jylla na ka daw ka jingphriang u COVID-19. 

Ïa katei ka Dorbar Mangtyngka la pynlong ha ryngkat ka jingbud pyrkhing ia ki kyndon ban ïada kynthup naduh ka thermal screening, ka jingphong ïa ki jingda khmut, ka jingkyllan dawai ia ki kti ha shwa ban rung shapoh ïing Dorbar. 

Ha katei ka sngi sdang jong ka Dorbar la wanrah ruh ia ka  Meghalaya State Agricultural Produce and Livestock Marketing (Promotion and Facilitation) Bill 2020 bad ruh ia ka amendment halor ka Meghalaya Labour Laws kynthup ruh ia ka Meghalaya Goods and Services Tax Bill, 2020.

Na ka liang u MLA jong ka Congress, Bah Mayralbon Syiem lyngba ka ‘zero hour notice’ u la buh jingkylli ruh halor ka jingpoi ki nong Meghalaya kiba wanphai na kylleng ki bynta jong ka jylla kiba hap ha ki red zone. 

U la buh jingkylli ruh halor ki jingmih ki jingtip ba ki iohlum ba ki paidbah kim bud pyrkhing ruh ia ki  kyndon ba la buh bad kumta u la kyntu ba ka jingpynsah ia kito kiba dang wanphai na shabar jylla ba ki dei ban sah ha ki jaka sah kyrpang ba la buh lane ki quarantine centre. Nalorkata u ai jingmut ruh ba la donkam ban kyntiew noh ia jingset khop ha ki jaka sah na ka 14 sngi sha ka 28 sngi.

Shuh shuh u la ong ruh ba ka sorkar jylla kadei ban kyrshan pisa ruh sha kito ki community quarantine centre ha ki shnong khnang ba kin lah ban pynbiang ia ka jingdonkam jong kito ki nongshong shnong kiba ym biang ki jaka ban set khop ha la iing la jong. 

Haba jubab halor katei ka zero hour notice, u Myntri Rangbah ka jylla, Conrad K Sangma u la ong ba baroh ki community qurantine centre kin ioh ia ka jingkyrshan pisa kaba mar 5,000 tyngka kaban sa ai lyngba ka Chief Minister’s Relief Fund. 

U la ong ruh ba baroh kito kiba dang wanphai na ka jylla ki la hap ban leh haduh ar tylli ki test, kata ka test kaba nyngkong kan dei lyngba ki Rapid Test Kits bad hadien lyngba ka PCR. La iathuh ruh ba kito kiba wanphai kin hap ban sah ha ki quarantine centre tad haduh ban da ioh ia ka report halor ka jingkoit jingkhiah jong ki, kin sa lah ban leit phai sha la ki ing ki sem, kata lada ka report ka long ‘Negative’. 

Shuh shuh u la ong ruh ba ka sorkar jylla ka la pan jingbit ruh ban pyndonkam da ki liengsuiñ ban wallam ia kito ki nongshong shnong ka jylla kiba dang sahkut shabar ka jylla. 

Katkum ka jingiathuh jong u, ki don haduh 7050 ngut ki nongshong shnong ka jylla kiba la wanphai sha ka jylla haduh mynta. U la bynrap ruh da kaba ong ba ka sorkar jylla ka la pyrshang lut ki lad ki lynti ba baroh kin ioh ban wanphai noh sha la ki ing ki sem hapoh kine ki ar taïew.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589