Sdang ka jingai jinghikai ban kyntiew ia ka kam rep tit ha ka thaiñ Mawkynrew

Shillong, Nailar 27: Kum shi bynta ban kyntiew ia ka ïoh ka kot ki nongrep ha ka thaiñ Mawkynrew, ka Mushroom Development Centre, Upper Shillong ka la wanrah da ka prokram ai jinghikai ia ki nongrep ka thaiñ ha Good Shepherd School Auditorium, Jongksha bad kane ka prokram ai jinghikai kan neh 20 sngi.

Ha kane ka sngi sdang ka jingai jinghikai la wan plie ia ka da u Myntri ka tnad Agriculture & Horticulture ka Sorkar Jylla, u Bah Banteidor Lyngdoh uba dei ruh u MLA ka Mawkynrew Constituency ha ka jingiadonlang i Kong S Nongbet, Director ka tnad Horticulture, u Bah Sumarlang Kharlukhi, Asst. Director ka tnad Horticulture, u BDO ka Mawkynrew C &RD Block, Bah LT Tariang.

Nangta u Fr George, ki nongrep tip na ka Lum Rapleng Mushroom Farmers’Association, ki nongrep na ki shnong bad ki thaiñ ba marjan, ki riew rangbah, ki longkmie longkpa bad kiwei kiwei. Kane ka prokram ai jinghikai ka long kyrpang na ka bynta ka jingrep tit Oyster, tit Button bad tit Shitake khnang ba ki paidbah nongrep ka thaiñ kin lah ban sngewthuh bha ia kane ka jait jingrep.

Haba kren ha kane ka sngi, u Bah Banteidor u la ong ba ka jingkhmih lynti ka long ban kyntiew ia ka jingpynmih tit na ka 27 metric ton sha ka 5000 metric ton hapoh san snem. “U tit u dei u jait jingbam ba lah dor ban die bad u dei uba suk ban rep bad sumar hynrei donkam pat ka jingtrei shitom bad jingpynleit jingmut ha ka kam”, la ong u Bah Banteidor Lyngdoh.

U la ong ba nalor kiwei pat ki kam rep ki nongrep ka thaiñ ki dei ban pynshlur ialade ban shim ia kane khnang ba kan long ka lad ban kyntiew ia ka kamai kajih. “Ngi donkam ban pynkylla ia ka rukom jingim da kaba wad ki lad kiba thymmai ha ka rukom rep khnang ba ngin lah ban kyntiew ha ka ïoh ka kot”, la ong u Bah Banteidor uba la kyntu ia ki nongrep ban shim kabu ia ki skhim Sorkar khnang ban long ka jingmyntoi.

Haba kren halor ka jingai jinghikai, u la ong, “Nga bad na ka liang ka tnad ngi angnud ban kyntiew ia ki nongrep bad kane ka jingai jinghikai ka long ban tip kumno ban pyndonkam lane ban trei. Lada kam don ka jingtip kan long ka jingeh kumno ban pyndonkam”. Ha kane ka sngi u Myntri u la sam ruh ia ki symbai tit sha ki nongrep.