Sdang treikam ka Consumer Protection Act, 2019

New Delhi, Naitung 20: Ka Consumer Protection Act, 2019 ka lah treikam naduh mynta ka sngi kata ha ka 20 tarik Naitung, 2020. Haba ai jingkren sha ki lad pathai khubor shaphang ka Consumer Protection Act, 2019 lyngba ka video conference hangne mynta ka sngi, u Myntri Sorkar Pdeng ba dei khmih ia ka Consumer Affairs, Food & Public Distribution, Ram Vilas Paswan u la ong ba kane ka Act ba thymmai kan pynkup bor ia ki nongthied bad ka iarap ia ki ha ka jingiada ia ki hok jong ki lyngba ki Ain bad ki kyndon bapher bapher ba lah pynbna kum ki Consumer Protection Council, ki Consumer Disputes Redressal Commission, Mediation, Product Liability bad ka jingpynshitom ia ka jingshna lane die ia ki mar ki bym biang / ki mar thok.

U la ong ba ka Act ka kynthup ka jingwanrah ia ka Central Consumer Protection Authority (CCPA) ban kyntiew, ban iada bad pyntreikam ia ki hok jong ki nongthied. Ka CCPA kan pynkup bor ban pynlong ia ki jingtohkit halor ki jingpynkhein ia ki hok jong ki nongthied bad ban wanrah ki jingujor/ jingbishar, ban phah pynphai ia ki mar ba lah dep thied, bad phah khang ia ki kam bad ki jingdie ki bym long kiba shngain bad ki jingpynbna (advertisement) kiba ialam bakla. U Paswan u la ong shuh shuh ba yn kynthup ki ain ban iada ia ki kam khaii beain lyngba ki rynsan e- commerce hapoh kane ka Act. La sdang ban pynmih ia ka gazette notification ban wanrah ia ka Central Consumer Protection Authority bad ki ain ban iada na ki kam khaii beain lyngba ki bor internet.

U Paswan u la ong shuh shuh ba hapoh kane ka ain, man ki kynhun ne ki riew shimet kiba trei ia ki kam e-commerce ki dei ban ai jingtip kaba iadei bad ka jingsiew khajna, ka jingioh pynphai, ka jing kylliang, ka warranty bad guarantee, ka jingpynpoi ia ki mar, ka rukom ioh jingsiew, ka rukom peit ia ki jingeh jong ki briew, ka jingshngain, bad kiwei kiwei kiba kynthup ruh ia ka ri ba ki trei kiba long kiba donkam khnang ba ki nongthied kin ioh ka jingtip kaba biang shuwa ba kin thied ei ei. U la ong ba ki rynsan e-commerce ki dei ba pdiang ia ki jingujor jong ki nonghied hapoh ka 48 kynta bad ba ki dei ban pynbeit ia ki jingeh hapoh shi bnai naduh ba ki ioh ka jingujor hapoh kane ka ain. U la ong ruh ba kane ka ain thymmai ka wanrah ruh ia ka jingbah khlieh halor ka jingbha jong ki mar ba die bad hapoh kane, u nongshna ia ki tiar, ne uba saindur ia ki kam ban die ki don lad ban shah dain kuna lada ki briew kim hun ia ki mar ba ki thied.

U Paswan u la ong ruh ba kane ka ain kaba thymmai ka pynsuk ia ka kam ban peit ia ki jingujor jong ki nongthied lyngba ki consumer commission kiba kynthup ka jingpynkup bor ia ki commission ha ki jylla lane ki distrik ba kin peit ia la ki jong ki order khnang ban ailad ia ki briew ba kin buh jingujor lyngba ka bor internet bad ba kin buh jingujor ha ki consumer commission kiba don bor ha ki jaka ba ki sah ki nongthied, ka jingpynlong ia ki jingbishar lyngba ki videoconference lada ym lah ban pynbeit ia ki jingeh hapoh ka 21 sngi.

U Myntri u la ong ba kane ka ain kaba thymmai ka don ruh ka bynta kaba iadei bad ka ‘Alternate Dispute Resolution’ ban peit ia ki jingeh. Kane kan pynsuk ia ki kam ba iadei bad ki jingujor. Ia kine ki jingujor yn wanrah da ki consumer commission haba don ki lad ban pyndep kloi ia ki bad haba ka don ka jingsngewthuh na baroh ar liang ban pyndep kloi kloi ia ka kam. Ia ka jingbishar yn pynlong ha ki Mediation Cell ban sdang hapoh ka jingpeit jong ki Consumer Commission. Yn ym lah ban kyrpad pyrshah ka jingiasuk lyngba kane ka jingbishar.

U la ong ba katkum ki kyndon jong ka ‘Consumer Disputes Redressal Commission Rules’, yn ym don jingsiew ia ka jingujor case kaba hapoh T. 5 lak. Ki don ki lad ban ai jingujor lyngba ki kam digital, ka jingpynpoi pisa sha ki nongujor lyngba ka Consumer Welfare Fund (CWF). Ki commission ha ki jylla kin ai jingtip sha ka Sorkar Pdeng man ka lai bnai halor ki jinglait kam, ka jingpyndep ia ki case bad ka jingsah teng jong ki case bad kiwei kiwei ki kam.

U Paswan u la pyntip ruh ba kane ka ain ba thymmai ka la wanrah ia ka bynta kaba iadei bad ka product liability ha kaba ki nongshna tiar, ki nongpynbiang ia ki kam ba die bad u nongdie ia kine ki don lad ban shah dain kuna. Kane ka ain ka aibor ia ka iing shari ba kan pynshitom ia kito kiba shna ne die ia ki mar ki bym biang. Ka iing shari, ha ka jingpynshitom kaba nyngkong, ka lah ban sospon ia ka lisen jong kine ki briew haduh ar snem bad ha ka jingpynshitom kaba ar bad hadien, ka lah ban weng syndon ia ka lisen.

Hapoh kane ka ain kaba thymmai, ha ryngkat ki kyndon, ki don ruh ki Central Consumer Protection Council Rules, Consumer Disputes Redressal Commission Rules, Appointment of President & Members in State/District Commission Rules, Mediation Rules, Model Rules and E-Commerce Rules and Consumer Commission Procedure Regulations, Mediation Regulations and Administrative control over State Commission & District Commission Regulations.

U Paswan u la ong ba ki Central Consumer Protection Council Rules ki aibor ban sdang ia ka Central Consumer Protection Council, kaba dei ka kynhun ban ai jingmut ban ialam da u Myntri Sorkar Pdeng ba dei ban peit ia ka Consumer Affairs, Food and Public Distribution ha ryngkat u Myntri Khynnah kum kum u Vice Chairperson ryngkat 34 ngut ki dkhot. Kane ka council ka ban don ka samoi treikam kaba lai snem, kan don ki Myntri ka consumer affairs na ar tylli ki jylla na ka thain shatei, shathe, mihngi, sepngi bad ka thain shatei lam mihngi. Ka don ruh ka lad ban sdang ia ki working group hapdeng ki dkhot jong ka council na ka bynta ki kam ba kyrpang.

U Paswan u la ong ruh ba ha ka Consumer Protection Act, 1986 ka ju don tang kawei ka lad ban ioh ia ka hok kaba bam por. La wanrah ia kane ka ain kaba thymmai hadien ba la dep pynkylla ia katto katne ki bynta khnang ban ai jingiada ia ki nongthied khnang ba kin ym shah thok ha ki nongdie dukan hynrei kin ioh jingiada ruh na kito kiba pyniaid ia ki rynsan e-commerce. U la ong ba kane ka ain kan long ka atiar ban iada ia ki hiok jong ki nongkhied kiba don ha kylleng ka ri.