Shimkhia u Conrad halor ka jingshah pynjulor ki longïing ha u slap bad phria

Shillong, Lber 30: U Myntri Rangbah ka Jylla u Conrad Sangma  ha ka jingsngewkhia halor ka jingshah ktah jong kiba bun ki jaka na ka jingther jong u lapbah lapsan bad ka jinghap u phria u la bthah a baroh ki bor pynïaid distrik ba kin ai jingïarap sha kito ki longïing bad kumjuh ki ïingsah ba shipor.

Mar ïa ïoh khubor bad ka jingshah ktah jong kiba bun ki shnong, u Conrad hynne ka sngi u la kren sha baroh ki Deputy Commissioner jong ki distrik ba kin leh ïa kaba donkam kynthup ïa ka tnat Disaster Management and Revenue.

“Nga la telephone ïa baroh ki DC bad nga la ong ïa ki ban kin bishar bniah halor kaei kaba ka mei mariang ka la ktah ïa ki jaka kiba bun,” ong u Conrad haba ïakren bad u nongthoh khubor ha ka sngi Thohdieng.

Na ka liang u Myntri Rangbah u la bthah ruh ïa ka tnat Disaster Management and Revenue ba kan shim jingkheiñ haba ïadei bad ka jinglut jingsep bad ruh ban ai ki lad jingïarap kiba kyrkieh lada ka don ka jingdonkam.

 

U la ïathuh ruh ba u ladep ban bthah ïa u Chief Secretary bad Additional Chief Secretary ba khmih ïa ka tnat Revenue bad Disaster Management ban shimkhia bad ban aiti ïa ka kaiphod halor katei ka mat.