Syrtok ki samla pule, mar ïa dep thoh eksam hap leit ieng laiñ sa ha Post Office

Shillong, Risaw 14: Watla ka skulbah NEHU ka la pynlong ‘online’ ïa ka eksam jong ki degree bapher bapher hynrei ki samla pule pat mar ïa dep thoh eksam mardor ki hap ban leit ieng laiñ sa ha post office ban leit phah ïa ki jubab lane ki answer script.

Katei ka rukom treikam ka la pynsyrtok haduh katta katta ïa ki samla pule namar ynda ki poi ha ki post office ki hap pat ban ieng laiñ bun kynta haduh ban da ïoh phah pat ïa kitei ki answer script sha ki college jong ki lyngba ka speed post.

Haba kren bad katto katne ki samla pule ki la ong ba watla ïa ki jingkylli ki ïoh online hynrei hadien ba dep thoh ki hap shondur ïa ki ‘answer script’ bad phah pat online. Hynrei ïa ka jubab kaba ki thoh pat ki hap ban leit thep lyngba ka post office.

“La bthah ïa ngi ba ïa ki ‘answer script’ hadien ba ngi la dep ban phah online ngi hap ruh ban phah da ka speed post sha ki jaka pule,” ong kitei ki samla pule haba kren bad ki lad pathai khubor.

Don pat kiba ïathuh ba kaba ktah ïa ki ka long ba ynda poi hangtei ki hap ban da bun kynta haduh ba kin da ïoh pat ban thep ïa kitei ki jingthoh.

Ha kane ka sngi, na ka liang jong ka Post Office (GPO) ha Shillong ki la hap ban khot ïa ka jingïarap lang jong ki pulit ban peit ba ka jingieng jong ki paidbah kan long kham pajih iwei na iwei pat katkum ki kyndon ban ïada na ka jingphriang u khniang jingpang COVID-19.

Haba kren bad ki lad pathai khubor u Controller of Examination ka skulbah NEHU, Dr. D Chaudhury u la ong ba katei ka jingbthah ïa ki samla pule ba kin hap ban phah ruh ïa ki answer script nalor ba ki la dep ban phah online ïa ki jubab ba ki la dep thoh ka long na ka bynta ban buh rekod na ka bynta ki jingdonkam hadien kiba lah ban mih.

Haba batai pat halor ka jingbthah ban phah da ka Speed Post u la ong ba katei ruh ka long kum shi bynta ban don ka rekod ba ki samla pule ki la dep ban phah ïa ki jingthoh jong ki.

La ïathuh ruh ba ïa kitei ki answer script ki samla pule ki hap ban phah shwa ïa ki jaka pule jong ki bad nangtei pat ki bor pynïaid jong kito ki college kin sa phah pat sha NEHU.