U bah Pynshngaiñ Syiem udei ban hiar shuki kum u CEM, dawa ki MDC PDF

Shillong, Ïaiong 03: Ka People’s Democratic Front (PDF) kaba don 11 ngut ki MDC ka lah byrmenan kad arliang lada u CEM ka KHADC u Bah PN Syiem um hiar shuki namar ki MDC jong ka, ki la pynsngew ba kim don shuh ïa ka jingshaniah ba un bteng kum u nongïalam jong ka Executive Committee.

Kine ki MDC kiba la pynsngew ïa kane ka jingbym hun shuh bad ka jinglong nongïalam u bah Pynshngaiñ kila ong, ba ka daw ba kim shaniah shuh ïa u CEM kadei namar jingpyndonkam bakla jong u ïaka T.28 klur da kaba ïaid lait ïa baroh ki MDC ka liang synshar khamtam ïa ki Executive Member (EM).

Ki la ong ruh ba um tang u la pyndonkam bakla hynrei u la knieh ruh ïa ka bor jong hynriew ngut ki MDC kaba ki don kum ki EM hadien ba ki la shah bhah kam.

Na ka liang, kine ki MDC ka PDF, kila ong ba dei hi u bah Pynshngaiñ uba la pynpaw ha ka jingïalang jong ka PDF ba un sa hiar shuki noh kum u CEM namar ba un leit shimti kum u Co-Chairman ha ka sorkar jylla bad ba u kwah ban pynleit jingmut noh ïalade ha ka politik ha ka jylla.

Nalorkata, la ïathuh ba kine ki MDC ka PDF hynne ka sngi ki la leit ban dawa na u President ka PDF, u bah Ivanlumlang Marbaniang ba udei ban shimkhia halor ka jingdawa ka jongki khamtam haba kim don jingshaniah shuh ïa u bah Pynshngaiñ kum u nongialam bad kila pynsngew ruh ba udei u CEM uba la shu leh donbor ha kiba bun ki kam ki jam jong ka Council.

Kine ki MDC kila pynpaw ruh ba lada u CEM um hiar shuki kumba ula khlei ïala ka juban lak, kim banse ban mih noh na ka PDF wat ban pynkhyllem ïa ka EC jong u bah Pynshngaiñ bad ban phaikhmat sha u bah Latiplang Kharkongor bad sha ka kong Grace Kharpuri ban ïalam ïaka EC kaba thymmai.