‘Um dei u Menshohnoh kumba kynnoh hynrei tang u samla niah kali die um’

Shillong, Lber 10: Ka long ka jingjia kaba sngewsih bad ka jingduhnong kaba khraw ïa ka ïing ka sem, na ka jingduh noh ïa la u doh u snam uba dang 24 snem ka rta naba u long u samla uba tynrong ban pyndap ha ïing ha sem, ïa ki jingdonkam jong ki para bad ki kmie ki kpa jong u.

Kane kadei ka khubor halor u Macmillan Kharshandi uba la khlad noh ha ka jingshah shoh ha ki paidbah ha ka 8 tarik u Lber ha ka shnong Pashang kaba hap hapoh ka Mawkynrew konstitwensi.

U Macmillan u la shah bom bad tied haduh ban duh ïa ka la ka jong ka jingim kaba ki paidbah kiba don kumba da ki spah ngut, ki la kynnoh ba ma u bad ki phra ngut ki paralok kidei ki menshohnoh.

Ha ka jinglum khubor shaphang u Macmillan, na ka liang u nongthoh u la ïoh jingtip ba u dei tang u khynnah bylla uba niah kali ban kit bad die um ha ka shnong Madanriting.

Haba ïoh ban ïakren bad u hynmen trai jong u samla Macmillan, u Jeff Kharshandi u ong,
“Ma nga bad u para (u Mac) jong nga, ngi dei ki nongbylla kiba niah kali kit bad die ha um ha shnong. Nga da kthang ba ki kynnoh ‘menshohnoh ia u para jong nga bad na ing ruh ngim dei kiba ri uta u ksuid u thlen.”

“Ngam lah mutdur bad nga kthang ngam lah shah ban ïohi ba i Mei i ïam pait dohnud”, u la ong da kaba khni ïam. “Ngi ia bylla baroh ar ngut ban pyndap ha ïing ha sem, ki para lai ngut (iwei i kynthei), I Mei bad ïa I pa (iba don hapdeng ka jingshitom”, u la ong.

Haba kynmaw ïa ka miet sngi u Blei kaba sniewbok eh na ka bynta ka ïing jong ki, u la ong, “Ngi la ïoh jingtip kumba 8 shiteng eiei na kiba la ïoh ïa kren bad ki paralok u Mac kiba la phet rieh sha khlaw kiba la ïathuh ba ki la shah bat shnong bad shah kynnoh menshohnoh.
Mar mar ngi la mih ban leit wad ïa u Mac sha kata ka shnong Syntung kaba ma u bad ki paralok jong u ki la leit kai”, u la ïathuh.

“Ngi la shu pynpah horn lynter lynti bad peit sha ki jaka khlaw da ka jingkhmih lynti ba un ïa mih bad ba lehse u para jong nga ruh nga mutdur ba u la ïoh phet lang”, u la ïathuh.

U Jeff u la bynrap ba ynda poi shajan katei ka jaka kumba ha ka por 12 shiteng, ki paidbah ba bun bad kynthei bad shynrang ki la pakhang lynti ïa ngi bad kim shah ban rung ryngkat ki kyntien jingkynnoh ba ngi dei ki menshohnoh bad ba khot ïa I Mei bad ki kynthei kiba wan lang bad ngi ar kali da ki thlen kmie ki thlen kynthei.

“Ki pulit ki la iaid shwa sha khmat jong ngi hynrei ki paidbah kim ailad bad ki pulit ki don tang lai ngut bad ki paidbhur ki pyndonkam da ki ktien ba khor bad sngewjli ban sngap”, u la ong.

“Ngim ïohi eiei bad tang ka jingthaba ki headlight kali bad ki paidbhur ryngkat ki kynnoh ba ngi kiba wan wad ruh ki khot da ki kmie ki kpa menshohnoh ki kmie ki kpa thlen. Ki pakhang da ki maw ki dieng ia ka surok”, u la ïathuh.

“Ngi hap ban ap haduh ban da wan sa kawei ka kynhun pulit. Hadien ba la ïoh lad ban tur ki pulit, kumba thlieh ïa ka dohnud nga shu ïoh sngew ba ki ïa kren ba ‘u dei u Mac bad u la ïap’. Nga la peit ïa I Mei bad kiba ïa donlang”, u la ïathuh.

“Ki pulit ki la rah ïa u Mac bad kine kiba mynsaw sha ka PHC (Jatah) bad hangto nga la ïoh sngew ba ki ïa kren ba um don shuh”, u la ong.

“Ngi la wan poi sha Shillong haduh ka por 5 baje mynstep bad la kit beit sha Civil kumjuh ïa ki paralok u Mac kiba la mynsaw”, u la ong.

“Ka dei tang ka jingbakla lynti bad ki paralok u Mac ki la ïathuh ïa nga ba haba ki kylli ba uwei u tymmen hadien ba ki la wan phai ban pyni lem ka lynti sha Shillong, u la ong ‘me ia wan naei katta miet mem ïa tip ba dang jah khynnah ha kine ki sngi ba kit menshohnoh'”, la ïathuh u Jeff.

“Kaei kaba pynkthang eh ka long ba ki la shim jyndat ïa ka mynsiem u para jong nga da ka jingkynnoh kaba khlem nongrim khlem ap da ïa kren para Khasi para Khara”, u la ong.

Kum ban shu kdew ba u Macmillan Kharshandi ryngkat ki phra ngut ki paralok jong u ki la leit kai sha ka jaka jngohkai pyngngad ha kshaid Wah Rashi ha Syntung ha ka sngi u Blei ban ïa bam khana sngewbha artad.

Hynrei ynda la wanphai ki la shah pakhang lynti ha ki paidbah kiba la kynnoh ba ki dei ki ‘menshohnoh. Kine ki paidbah khlem pyrkhat ki la bom la tied ia kine ki samla tad haduh ba u Mac un da khlad noh na kane ka pyrthei, katba u samla Teiborlang Kharbyngngar bad u samla Ricky Dkhar, ki la mynsaw jur.

Kiwei pat ki hynriew ngut ki la ïoh ban phet rieh da ka said sha khlaw tad haduh ba ki pulit ki la ïoh ban pyllait ia ki ha ka step sngi nyngkong.

Ki paidbah nongshong shnong ka Madanriting ki la ia kynduh ia u MLA ka Mawkynrew Constituency, u Bah Banteidor Lyngdoh, uba dei ruh u Myntri Sorkar Jylla ha ka por ba u la leit sngewlem ha ïing u samla Macmillan bad dawa ba dei ban khang ïa ka jaka jngohkai ha Syntung.

U Myntri u la kren shai ha khmat jong ki ba kiba shim ïa ka aiñ ha la ki kti kin nym lait jem satia.

“Nga wan hangne naba nga don ka jingsngewkhia ïa kane ka jingjia bad nga sngewlem na ka bynta ka longïing kaba la duh noh ïa la u khun”, u la ong.

Ki longkmie kiba leit lang ha katei ka miet ba jia ka jingjia, ki la ïathuh ïa ka jingjia kaba sngewsih kaba ki la ïa kynduh ha katei ka miet. Ha kane ka step mar ïa rung u Myntri ban kren ïa i kmie u samla Macmillan, I la shu ïam pait dohnud na ka bynta kane ka jingïakynduh kaba khlem poi pyrkhat.

4 thoughts on “‘Um dei u Menshohnoh kumba kynnoh hynrei tang u samla niah kali die um’

  1. Shaei keiñ ngin poi,namar ba ka spah ruh kan ym lah bansiew kylliang iaka mynsiem briew..

  2. Ka ktien u Blei kala iathuh shai Men ym pyniap ka Long ka pop ka bainong ba khraw ki ioh kito ba pyniap ia u max Blei don ryngkt ma me iaka ing ka sem jong u Mac Amen🙏

  3. Haba para khasi ruh kumne te haei kan shong shngain ka ri khasi jongngi, da kaba suk kiwei ki jait ki kloi ban pynkyllon iangi, haba ka Ain ka don ban bishar ban wad bniah balei pat ki briew ki thaw Ain hi da lade da kaba jrong kti da kaba shim syndon iaka jingim u briew khlem tip iaka jingshisha la udei shisha ne em uta uba ki tharai. Bunsien kum kine ki ju jia ha ri khasi jongngi bad dei ban leh eiei ban rat dyngkhong syndon ia kum kine ki jingjia😡😡

  4. Tip u khasi ngi khlm da kylli bha balei un da ia jrong kti A Blei un don ryngkat lng ka iing ka sem i bah Mac kumno kein ko khasi khara ngi phi nud bn pyniap haba phi lh ialong khristan phim tip se ka kam pyniap ka long ka pop da kylli bha se iano2 nai shu bam jakhkuit ha jaka phin ia tylli para khasi hynrei phi ia pyniap kumno phim ia don mnsiem lng se u bapli u khynnah rit😭😭😭Blei un don ryngkat Amen

Comments are closed.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589