Wanrah ka KHADC ïaka mang tyngka kaba 243.72 klur

Shillong, Jylliew 24: Ka KHADCka la wanrah ia ka mangtyngka ba pura kaba long 243.72 klur tyngka na ka bynta ka samoi treikam jong u snem 2020 – 2021.

Katei ka mangtyngka kaba duna 50,190 tyngka, ka kdew ba ka mang tyngka ban pynlut kaba long 243,72,89,930 tyngka ka kham heh khyndiat ia ka mangtyngka jong ki jingmih kaba long 243,72,39,020 tyngka.

Haba wanrah ia ka mang tyngka ha ka sngi sdang jong ka Dorbar Mangtyngka  jong ka KHADC, u Deputy CEM ba dei peit ia ka pla tyngka, Bah Gigur Myrthong u la kular ruh ba ka Executive Committee kan shimkhia ban trei shitom na ka bynta ban kyntiew ia ka ioh ka kot jong ka Council.

U Deputy CEM u la pyntip ruh ba ka jingsiew na ka sorkar jylla haba iadei bad ka bhah mar poh khyndew kim long satia kiba tikna hynrei la shu siew khyndiat khyndiat na ka por sha ka por. “Ha u snem 2019 -20 ka sorkar jylla ka pyllait tang 1,53,29,845 tyngka bad kane ka la pynhiar ia ka jinglum khajna jong ka Council.”