Wat pynkhraw ïa u COVID-19 ong u Director ka Health Services

Shillong, Naitung 14: “Ngim dei ban pynkhraw ia u khñiang jingpang COVID-19 bad ngim dei ban tieng”, la ong u Dr Aman Warr, DHS (MI) haba kren ha ka jingialang pynshai ban kyntu ia ki paidbah da ka tnad ka Koit ka Khiah ban nym tieng ia une khniang jingpang ha Nongkrem ha ka step sngi Ba-ar hadien ba u wei na ki nongshong shnong kane ka shnong u la ïoh pang COVID-19.


“Ngin bud ryntih lai tylli ki jingbthah kata ban leh khuid ia ki kti, ka jingpynjngai iwei na iwei pat bad ban deng ia ki facemask ban nym ailad ia une u khniang jingpang ba un ia bit iwei na iwei pat”, la ong u Dr Warr.


“Ngin hap kheiñ ialade iwei pa iwei na ngi kum kiba don ka jingpang COVID-19 khnang ba ngin sngewthuh bad nang ban kiar na kane ka jingpang. Ngi donkam ban pynthymmai ia ka rukom im ym eh tang haba iada ia ka jingpang COVID-19 hynrei kiwei pat ki jait jingpang kumjuh”, u la ong.


Haba pynshai halor ka jingioh pang COVID-19 uba na Nongkrem, u la ong, “Uba na kane ka shnong u ba la ia kynduh bad u nongpang COVID-19 ym dei eh ba ki ia kynduh slem. Baroh kiba jan eh ki long negative, kiba ia kynduh bad ki bahaing jong ki ruh ki long negative bad shngaiñ. Ki dei ki low risk contact”.


“Ngi hap ban im bad u khñiang bad u long kum ka ‘flu’. Ngi hap ban sngewthuh ban shong quarantine 14 sngi yn shong marwei ka lah ban ktah”, u la ong bad bynrap, “Balei ka jur kane ka jinpang ha kiwei ki Jylla namar  ka jur ka jingtieng ha ki briew”.


“Ngin ialeh ban sumar ia kiba shitom ha iing lajong..ngi dei ban sngewthuh ba ngim dei ban tieng bad ngi dei ban kheiñ beiñ. Lada ka kiew jong ka jingpang, ngi hap ban ia treilang. Ka shnong kan sumar lada ym biang ki longïing bas ki longïing kiba ym lah leh ia ka home quarantine ka shnong kan iada.Wat ai ba ka jingburom, ka jingiatiplem jong ngi kan jah noh na ngi”, u la ong.


Kane ka kynhun ki ophisar ka tnad ka Koit ka Khiah ka Sorkar Jylla ha ka jingialam khmat u Myntri ba dei peit ia ka tnad, Bah AL Hek ki la hiar sha ka shnong Nongkrem ban kyntu ia ki paidbah nongshong ba kin nym dei ban sheptieng ha ka jingiakhun pyrshah ia ka jingpang COVID-19.


Ha kane ka jingia donlang ruh da u Bah Lambor Malngiang, MLA & MDC ka Nongkrem Constituency uba dei ruh u Chairman ka State Planning Board ka Sorkar Jylla, ki nongialam ka Nongkrem Dorbar Pyllun ba kynthup ia u Chairman u Bah Bhalang Lyngdoh, uba la pyniaid ia ka jingialang, u Bah Ailad Dkhar, Secretary, u Dr M Basaiawmoit, DMHO, u Dr B Syiem bad kiwei.


Kane ka jingialang ka long shi bynta ban pynshai sha ki paidbah nongshong shnong ba kim dei ban don ka jingsheptieng hadien ba u wei na ki nongshong shnong kane ka shnong u la bit jingpang COVID-19 na u wei u briew uba la wan sha ka jingkhawai iathoh shongkurim ha Greenwood Resort, Khanapara ha ka 27 tarik u bnai ba la dep bad ki bor pyniaid shnong ki la pynjari da ka lockdown ha kane ka shnong.


Na ka liang u Bah Lambor Malngiang, u la kyntu ia ka tnad ka Koit ka Khiah ban leh ia ka jingtest naphang ia ki nongshong shnong ha kane ka shnong khamtam eh ia kiba la kynduh mar khmat ne pateng ia u nongioh pang COVID-19 na kane ka shnong.


“Ki longïing ha ka Shnong hi ka long kiba ia bun bad nga sngew ban kyntu ia ka tnad ka Koit ka Khiah ban leh ia ka Random Testing”, la ong u Bah Lambor. Halor kane, u Dr M Basaiawmoit, DMHO u la kular ban leh ia kane da kaba test naphang da ki Antigen Kits Test ia ki dkhot longïing kiba ia kynduh ia uba ïoh pang COVID-19.


U Bah AL Hek u la ong, “Ka jingtieng ka la rung palat ha ka jingmut jingpyrkhat jong ki briew bad ngi la leit na kawei kawei jaka sha kawei pat sha ki jaka ba don jingjia ba ioh COVID-19”.


“Ngi iaid ban ai ka jingïada ia ki paidbah bad ngi kwah ban pynskhem ia ki ha ka jingmut. Ngi dei ma ngi ban kit ban bah ia la ki bahaïing bad ym dei ban tieng..Kam pat don ka jingsaphriang kane ka jingpang sha ki paidbah. La leh test ia ki high risk ne ki low risk bad ki low risk contact baroh ki long negative”, la ong u Bah Hek.


“Ngin ia leh ban kiar na ki jingialum bun briew bad ngim dei ban kyntait iano iano. Kumba ai nuksa la ong ba ki nongtrei NEIGRIHMS kim long shuh wan phai iing hynrei ka Dorbar Shnong Mawkasiang ka la pynkhreh ia ki jaka sah”, la ong u Bah Hek.