Ym don por u Myntri ban sngap ïa ki jingkynthoh u MLA ka BJP na South Shillong

Shillong, Nailar 02: U Myntri ka Koit ka Khiah, u Bah AL Hek mynta ka sngi haba kynthoh ia ka jingkynnoh u MLA ka BJP na Shillong South, Bah Sanbor Shullai u la ong, “Ban sngap ia ki jingkynthoh te ym long treikam shuh”.

Hynnin ka sngi, u MLA ka South Shillong u la kynnoh ba ka tnad ka Koit ka Khiah ka Sorkar Jylla ka khlem lah ban leh eiei ha ka jingiakhun pyrshah ia ka khlam COVID-19.

U Bah Hek (da kaba rkhie) u la ong ba kiba kren ai kin nang kren hynrei ma u kum u Myntri kum u MLA lem bad ka tnad hi kin iaid beit sha khmat ia ka kam lajong. “Ngi dei ban iaid beit, ki jingkynthoh kiba bun lada phin sngap ia ki jingkynthoh te ym poi treikam shuh”, u la ong haba ia kren bad ki nongthoh khubor.

Ia kane u ne u MLA ka BJP na Pynthorumkhrah u la kren hadien ka jingwan jurip bniah ia ki jaka ba la pynhap ha ki Containment Zone ha ka Shnong Mawpat myn ha ka nohphai sngi u Blei ha ka jingiasynran lang u DHS (MI), Dr Aman Warr, ki ophisar na ka tnad ka Koit ka Khiah, i BDO ka Mawpat Block, ki bor pulit, ki bor pyniaid shnong ba kynthup ia u Bah Khrawbuit Ryntathiang, Rangbah Shnong.

Ha ka sngi Saitjaiñ, u Bah Sanbor Shullai u la ther tyngeh ia ka tnad ka Koit ka Khiah ka Sorkar Jylla ba kam shym la shimkhia ia ki jingeh kiba ki nongshong shnong ha ki jaka ba la pynhap ha ki Containment Zone ki ia kynduh. U la ong ba ka tnad ka shim sting da kaba pynslem ban test ia ki nongshong shnong ha kine ki jaka Containment Zone.

Ha kawei pat ka liang u Bah Hek u la ong ba ki la wan ban ia peit lang ia ki jaka ba la pynhap Containment Zone ha Mawpat ban tip ia ki jingeh kiba ki paidbah nongshong ki ia kynduh. “Na ka liang ka Dorbar Shnong, ka Sorkar bad ka tnad ka Koit ka Khiah ki la ialeh ban pynbiang nadong shadong”, u la ong.

“Hynrei kiei ki jingdonkam kiba ia dei bad nga u MLA ia kata ngi ia treilang na ka por sha ka por”, la ong u Bah Hek. Katba na ka liang u Bah Khrawbuit Ryntathiang, Rangbah Shnong u la ai khublei ia ka tnad ka Koit ka Khiah kumjuh ia u MLA kiba la ai jingïarap ia ka Dorbar Shnong ha ka jingiakhun pyrshah ia ka COVID-19.

“Ngi don ka Dorbar Shnong Relief Fund ban iarap ia ki nongshong bad kane ka Fund ka dei na ka jingianoh synñiang hi ki para shnong para thaw ban iarap ia kiba donkam kyrkieh ia ka jingïarap”, u la ong. “Ngi kyntu ia ki paidbah ba kin nym sheptieng hynrei ngin ia khun da ka jingsngewthuh bad jingshemphang bad ngi kitbok ba kiba ngat ha kane ka jingpang ruh kin koit noh kloi”, u la ong.