Yn aiti ka sorkar ha ki expert agency ban tohkit halor ka jingpei ki jaka pynlang jaboh Uranium

Shillong, Risaw 16: Ka sorkar jylla ha ka sngi Thohdieng ka la thung da ka Expert Agency ban leit tohkit bad wad bniah halor ka jingmih khubor ba ka don ka jingpei ki jaka pynlang jaboh Uranium ha Domiasiat.

Haba kren bad ki lad pathai khubor u Symbud Myntri Rangbah ka Jylla Bah Prestone Tynsong u la ong ba katei ka rai ba ka sorkar ka shim ka dei hadien ba ki iohi ia ka jingkynnoh kumbaya pynpaw da ki kynhun bad sengbhalang kiba leit sha katei ka jaka.

“Ka jingthung ia ka Expert Committee ka long ban tih bniah halor ka jingpei jong kitei ki jaka pynlang ia ki jaboh Uranium hangtei,” u la ong.

Nalorkata u iathuh ruh ba ia katei ka kam ki aiti ha u Chied Secretary ka Jylla ban leh ia kaba donkam.

Ha kajuh ka por u Symbud Myntri Rangbah u la ong ruh ba ka sorkar ka la rai ruh ban phah plie biang noh ia baroh ki iew khappud kata kynthup ia kito kiba don ha ki khappud bad ka Assam bad kumjuh bad ka Ri ba marjan ka Bangladesh.

Kawei pat ka rai ba ka sorkar ka shim ka long ruh ban phah plie noh ia ki jaka shong dihkyiad lane ki Bar hadien ka Puja kata naduh ka 26tarik mynta u bnai.

La iathuh ruh ba u Myntri Rangbah dalade hi u la kren bad u Myntri Kampohiing ka Ri bad ruh ha u Secretary ka tnad Kampohiing ka Ri halor ka jingshah kem u Fr. Swamy.