Yn leit ïashim bynta ki heprit ka Aroha Junior ha ka jingïakob ‘Choir’ sha Ri Wales

  • Shillongmail
  • March 22, 2018
  • Comments Off on Yn leit ïashim bynta ki heprit ka Aroha Junior ha ka jingïakob ‘Choir’ sha Ri Wales

Shillong, Lber 22: Kumba 20 ngut ki heprit na ka kynhun Aroha Junior Choir ki la ïoh ïa ka lad ban leit ïakhun ha ka jingïakob ba la ai kyrteng ka ‘71st Choral competition’ ka ban pynlong ha Ri Wales ha ka shnong Llangollen naduh 2 haduh 8 tarik u Naitung 2018.Ha kane ka jingïakob la ioh jingtip ba kin don kumba 40 ngut ki kynhun rwai (Choir) ba kynthup ïa 4000 ngut ki nong ïa shim bynta na kylleng ki Ri ka pyrthei.

Haba ai jingkren sha ki nongthoh khubor hynne ka sngi, ka Kong Pauline Warjri, president ka Aroha Music bad Cultural Society, ka la ong, “Kane ka dei ka sien kaba nyngkong ba ka kynhun rwai (choir) kan leit ïa shim bynta ha kane ka lympung jingïakob shabar ka Ri India bad ngi donkam ban pynpaw pyrthei ïa ka sap ki khynnah ka jylla bad kumjuh ba ka nongbah Shillong kan paw shabar ka Ri.”

Hynrei haba ïadei bad kane ka jingïakob ka la ïathuh ba ka kynhun kan donkam kumba T.40 lak bad na kane ka jingdonkam ka kynhun kala lah ban pynmih tang kumba T.20 lak.“Ngi kyrmen ba ngin ioh jing ïarap ruh na ka sorkar haba ïadei bad ka jingleit ban ïakhun ha katei ka jingïakob bad shen ngin sa pynlong ïa ka tamasa bam ‘food fest’ ha All Saints Hall ha ka sngi Saitjaiñ kum shi bynta ban pynmih pisa ban leit sha katei ka jingïakob ha Wale’s,” ka la ong.

Ka Kong Pauline kala ïathuh ruh ba ki lah don kumba 40 ngut ki khynnah hynrei lah jied noh tang 20 ngut ban leit ïa shim bynta ha katei ka jingïakob.“Ngi khynnah ba lah shah jied ki lah sdang ïa ka jinghikai rwai haduh u bnai Nohprah mynshem snem,” ka la ong bad bynrap ba lyngba kane ka jingïakob ki khynnah kin ioh ruh ïa ka lad ban ïa kren bad ban ioh jingmut ruh na kiwei ki dkhot jong ki kynhun rwai na kiwei ki Ri ka pyrthei.