Yn pynshitom ka sorkar ïa kiba pynkheiñ kyndon COVID-19

Shillong, Naitung 09: Ka sorkar jylla ha ka sngi Palei ka la pynbna ba la rai ban dain kuna haduh 500 tyngka ia kito ki paidbah ki bym deng mask ha ki jaka paidbah, kiba biah pathar bad ruh ia kito kiba ieng lymbrum kiba long pyrshah ia ki kyndon jong u COVID 19.

Haba pynbna ia kane, u Myntri Rangbah ka Jylla, Conrad K Sangma u la ong ruh balada kito kiba shah dain kuna ki dang bteng ban iai leh biang kumjuh kin sa shah dain kuna arshah kata haduh 1000 tyngka.

Kawei pat ka rai ba ka sorkar ka shim ka long ba la rai ban kyntiew haduh 4 persen ka bhah ai kam ia kito kiba don jingthut ha ka dkhot met. Haba pynbna ia kane, u Myntri Rangbah ka jyllla, Conrad K Sangma u la ong ruh ba ka jingthung kam ia ki kan long beit ba na man ki 25 ngut ba ki thung kam, iwei in dei iba don jingthut ha ka dkhot met.

Ha kajuh ka por u la iathuh ba la rai ruh ban kyntiew noh sha ka 2.50 lak tyngka ia ka bai luksan na k abynta kito ki lanot kiba khlad na ka jingthut ka bording.

Kiwei pat ki rai ki kynthup ia ka sienjam ba la shim da ka ka sorkar ban ioh biang ia ki khajna kaba kot sha ka 152 klur tyngka kaba ki nongsiew khajna kiba don haduh 8005 ngut kim pat siew haduh mynta.

Lyngba katei ka lad ba la tip kum ka State Amnesty Scheme, kitei ki nongsiew khajna ki ioh por 6 bnai ban siew lym kumta kin ngat ha ki kyndon jong ka aiñ.