20 persen hiar ka jingjaboh jong ka haw haw ha nongbah Shillong na ka daw u COVID-19

Shillong, Jymmang  07: Ka jingkhangdam ïa ka jylla bad ïa ka ri India baroh kawei ban khanglad ïa ka jingphriang jong u khñiang COVID-19, ka la long pynban ka jingkyrkhu ïa ka mei mariang ha ka jylla khamtam eh ha nongbah Shillong namar ka jingjaboh jong ka lyer ka la hiar haduh 20 persen.


Katkum ka jingïathuh jong u Environment Engineer jong ka Meghalaya State Pollution Control Board, Bah Wanshan Kharkrang u la ong ba ka daw ka jinghiar kynsan ka jingjaboh jongka lyer ha nongbah Shillong kadei eh na ka daw ka jingduna ka jingïaid ki kali bad ka jingsangeh treikam ki karkhana.


Katkum ki jingtip ba la ioh lum na ka Central Pollution Control Board, ka jingkhuid ka lyer ha Shillong (Air Quality Index) tad haduh ka 4baje jong ka sngi Palei ka long ‘28’ kaba mut ka hap ha ka thup ‘ka khuid bha’. La kdew ruh ba shwa ban sdang ka jingkhangdam pat ka nongbah ka la paw kum ka jaka ba ka jingkhuid ka lyer ka la shu long pdeng. 


“Ka jingdon ka lyer khuid ka la nagn kiew ha Shillong bad ngi lah ruh ban ong ba ka la nang kiew wat ha ka jylla baroh kawei,” u la ong.
“Ha kiwei pat ki bynta jongka jylla, kum ha Byrnihat ba ki karkhana ki don baroh arliang kata ha Assam bad Meghalaya tang na ka daw ka jingkhangdam namar u COVID-19, baroh ki karkhana ki la khang lut bad kumta ka jingjaboh ka lyer ka la hiar bha.” 


Nalorkata, utei u Engineer u la kdew ruh ba tad haduh mynta ki khlem ioh shuh ïa ki jingtip ba kin don kiba ud ba ki shem shitom ban ring mynsiem na ka daw ka lyer jaboh. 


La ïathuh ruh ba katei ka tnad treikam ka don lai tylli ki jaka thew ïa ka jingkhuid jingjaboh jong ka lyer ba kynthup ha nongbah Shillong bad ruh ha Byrnihat. 


Haba jubab halor ka jingkylli la ka jylla kan sakhi ïa ka jinghiar jongka carbon ha une u snem, ka jubab ba u Bah Wanshan u ai ka long, “Lada kane ka jingteh kyndon ïa ki kali ban ïaid ban ieng ka dang ïai bteng, khlem artatien u snem 2020 un long uwei na ki snem ba sakhi ïa ka lyer kaba khuid bha lada shim na kawei ka liang namar ngi sakhi ba ki duna bha ki kali kiba leit ba wan kaba long ka dawbah ka jingduna ka lyer jaboh.” 

Door Step Delivery Of Medicine

We Advertise

Shillong Mail shillongmailnews@shillongmail.com

  • 7085718589
  • Head Office: Langkyrding Mihngi
    Shillong
    For Advertisements
    Call Us Here 98634-49079
  • ################