60 ngut ki la khlad na u COVID-19 hapoh ka Jylla

Shillong, Risaw 6: Ka jylla mynta ka la don haduh 60 ngut kiba khlad na ka daw u COVID hadien ba sa uwei pat u rangbah na Ri Bhoi u la khlad hynne ka step por 5:00 baje ha Civil Hospital. Utei u rangbah  u dei uba tip kyrteng kum u Thakur Singh Rai na Umsning Patarim 87 snem ka rta.

Ha kane kajuh ka sngi ki la don ruh haduh 270 ngut kiba dang ia bit thymmai ia utei u khniang jingpang ba kynthup ia ki 195 ngut na East Khasi Hills, 26 ngut na West Garo Hills, 19 ngut na Ri Bhoi, 10 ngut na West Jaintia, 7 ngut na South West Garo Hils, 6 ngut na East Jaintia, 3 ngut na North Garo, 2 ngut na East Garo, mar iwei na West bad South West Khasi Hills.


Tad haduh mynta ka jingdon kiba dang pang baroh ki long 2371 ngut.
Ka jylla ka sakhi ruh ba ki don 115 ngut kiba koit hynne ka sngi, kitei ki kynthup ia ki 71 ngut na East Khasi Hills, 31 ngut na West Garo Hills, 05 ngut na North Garo Hills, 04 ngut na Ri Bhoi, 03 ngut na South West Garo Hills bad 1 na East Garo Hills.


Lada khein kyllum lut, kiba la koit haduh mynta ki la poi haduh 4606 ngut haduh mynta ka sngi.