Ai jingmut u lamphang ïa ka sorkar jylla ban pyrkhing ïa ki jaka rung kiba ha khappud

Shillong, Ïaiong 2: U lamphang ka ïingdorbar thawaiñ ka Jylla u bah Metbah Lyngdoh mynta ka sngi u la thoh da ka shithi sha u myntri rangbah ka Jylla, u Conrad K Sangma ha kaba u la ai jingmut ban thaw ïa ki lad ki lynti kiba kham khlaiñ ban pyrkhing ïa ki jaka rung jaka mih kiba don ha khappud bad ka jylla Assam.

Kane ka jingai jingmut jong u lamphang kadei hadien ka jingkiew jong ki briew kiba kem ïa u khniang jingpang Coronavirus ha ka jylla Assam.

Ha ka shithi sha u myntri rangbah, u bah Metbah u la kyntu ïa ka sorkar jylla ban thaw ïa ki lad kiba kham khlaiñ ban khang dam ïa ki jaka khappud la ka long bad ka Bangladesh kumjuh ruh bad ka jylla Assam.

Ki jaka kiba u lamphang u ai jingmut ban khang dam kidei ki jaka kiba ha Ratacherra East Jaintia Hills, Saitsama, Umransu bad Dawki West Jaintia Hills, Byrnihat, Umsiang Maiong, Mawlasnai Khyndewso (Mawhati konstitwensi), Sabuda point, ÏewMawroh, Rani Godown (Jirang konstitwensi) kiba ha Ri-Bhoi District, Athiabari, Hatim bad Langpih ha West Khasi Hills, Dainadubi bad Bajengdoba ha North Garo Hills, Phulbari, Tikrikilla bad Dalu ha West Garo Hills bad Garobadha ha South West Garo Hills.

U bah Metbah u la kyntu ruh ïa ka sorkar ban khang shuwa ïa ki jaka pynlong ïew kiba don ha ki jaka bapher bapher jong ka Jylla.

U lamphang ka ïingdorbar thawaiñ u la ong ruh ba ka sorkar jylla kadei ban nym pat ailad shuwa ïa ki hynñiew ngut ki briew kiba na ka jylla ban wan rung katba kim pat pyndep ïa ki jingsumar jongki kata ha Delhi bad Uttar-Pradesh bad yn ailad ïa ki tad ynda la ai jingbit da ki bor kiba khmih na ka tnat ka koit ka khiah.

Nalorkata, u lamphang u la kyntu ruh ïa ka sorkar jylla ba kan buddien ïa ka leit ka wan ruh jong kito ki briew kiba la ïoh ïa u khniang jingpang coronavirus namar ïoh ki ladep ban ïaid lynti na ka jylla Meghalaya.

Ha ka shithi kaba u phah sha u myntri rangbah, u lamphang u la ong ruh ba kito ki samla pule kiba pule shabar ka jylla, kiba don jingthmu ban wanphai sha la ïing, kim pat dei ban kyrkieh hynrei ban sah shuwa ha la ki jong ki jaka katba ym pat weng ïa ka jingkhang shnong kaba la pynbna da ka sorkar India namar kan long kum ka jingtehlakam bad ban ïada ïa ki paidbah ka jylla na ka jingsaphriang u khniang jingpang bad kumjuh ruh kan nym ktah ïa ka koit ka khiah jong ki hi.

 “Ha ka jingailad jong ka sorkar ïa ki paidbah ban thied bad ban pet ïa ki mar bam mar dih, nga kyntu ruh ïa ki bor sorkar ba kin pyrkhing bad ban nym ailad ïa ki paidbah ba kin ïa lum hynrei ban pynthikna ba ki paidbah kidei ban ieng jngai kumba 2 meter na iwei iwei. Kumjuh, ruh dei ban pynkhlaiñ ïa ki lad ki lynti kumno ban pynpoi ïa ki mar bam sha ki ïing briew,” ong u bah Metbah.

Ha kawei ka liang, u lamphang u la kyntu ïa ka sorkar jylla ba kan pyntip lang ïa ka jingtreikam jong ka sha baroh ki nongmihkhmat ka ïingdorbar thawaiñ haryngkat ka kopi sha ka Assembly Secretariat.

Door Step Delivery Of Medicine

We Advertise

Shillong Mail shillongmailnews@shillongmail.com

  • 7085718589
  • Head Office: Langkyrding Mihngi
    Shillong
    For Advertisements
    Call Us Here 98634-49079
  • ################