Da ka Master Plan yn pynkhreh ka KHADC ban pynheh pynbha ïa ka ïew ha Diengpasoh

Shillong, Risaw 09: Ka Khasi Hills Autonomous District Council (KHADC) kan pynkhreh da ka Master Plan na ka bynta ban pynheh bad pynbit pynbiang bha ia ka ïew ha ka Shnong Diengpasoh kaba ju pynlong shisien shi taiew ha ka Sngi Ïew Lyngka.

Haba kdew ia kane, U Bah Pynïaid Sing Syiem, Chairman ka KHADC uba dei ruh u MDC ka Sohryngkham Constituency u la ong ba kum u nongmihkhmat na kane ka thaiñ u kwah ban pynlong ia kane ka ïew kum kawei na ki ïew kaba biang lut ki jingdonkam kum ki basa, ki dukan, ki jaka ïeng kali, ki jaka buh mar bad kiwei.

Une u heh duh ka KHADC u la kdew ia kane hadien ka jingwan jurip ia kane ka Ïew ha ka Sngi Thohdieng ha ka jingiadonlang ka Executive Member ka KHADC ba dei peit ia ka tnad Market, Kong Grace M Kharpuri, ki ophisar na ka Council, u Acting Syiem ka Hima Mylliem, u Syiem Khynnah ka Hima Khyrim, ki riewrangbah, ki nongialam shnong ba kynthup ia u Bah Louis Mukhim, Sordar Diengpasoh lem bad kiwei kiwei.

“Ka jaka ban shna pynbha ia ka ïew ka don haduh kumba 15 acre bad ka jaka kaba kane ka Ïew ka ïeng ruh ka long ka jaka kaba pdeng bha na ka bynta kiwei ki shnong khamtam ka jingdon ka Shillong Bye-Pass kaba kham lah ban pynsuk shuh ia ka leit ka wan”, u la ong.

“Khamtam kane ka thaiñ ka dei kaba ki nongshong shnong ki im da ka rep ka riang bad ka jingdon kane ka ïew kan iarap bha ia ki nongrep”, u la ong da kaba bynrap, “Kum ha kane ka por ka jingiakhun pyrshah ia ka khlam COVID-19 kan long ka jingmyntoi ia ki nongshong shnong ym tang na kane ka shnong hynrei na kiwei ki shnong ba marjan”.

Na ka liang ka Kong Grace M Kharpuri ka la ong ba kum ka EM ba dei peit ia ka tnad Market ka kwah ba ki shnong hapoh u pud u sam ka jingpeit ka KHADC ba kin wan ban regularise ia ki ïew. “Ngi la ïoh pdiang ia ki jingjubab na ki katto katne”, ka la ong.

“Ki briew jong ngi ki im na ka rep ka riang bad da ka jingïatreilang na ka liang ka KHADC hi baroh naduh u CEM, Chairman bad ka tnad Market ngin lah ban kyntiew ia ki ïew”, la ong ka Kong Grace kaba la iaroh ia ka jaka ha kane ka shnong bad biang paka ban ai jingïarap na ka KHADC.

“Da ka jingdon ka Bye-Pass kane ka ïew lah ban kyntiew ia ka sha ka Wholesale Market. Haba ym biang ki Ïew ki hat kan shem jingeh ia ki nongshong shnong bad ngin wad lad lynti ban pynbha ia ki iew kiba hap ha ka jingpeit ka KHADC”, ka la ong.

Da kaba ong ba ka KHADC ka duna ia ka song pisa ban ai jingïarap, ka la kdew, “Ngi donkam ia ka pisa bad ngin pyrshang ban wad na ki skhim Sorkar Pdeng ban pynbiang ia ki jingdonkam. Kumba long mynta ki shu don beit tang ka ïew bad ki Cold Storage ruh kim pat ngin pyrshang katba lah ban pynbiang”.

Door Step Delivery Of Medicine

We Advertise

Shillong Mail shillongmailnews@shillongmail.com

  • 7085718589
  • Head Office: Langkyrding Mihngi
    Shillong
    For Advertisements
    Call Us Here 98634-49079
  • ################