Dawa ka AMDWU ban siew bainong trei kaba biang ia ki nongbylla ing briew

Shillong, Iaiong 27: Ki nongbylla trei ing briew ha ka lama ka All Meghalaya Domestic Workers’ Union (AMDWU) ki la kyntu ia ka sorkar jylla ban buh da ka dor kaba ryntih na na ka bynta ki nongbylla trei ing briew bad ban thung ia ka Domestic Workers’ Welfare Board ha jyll Meghalaya ban khmih ia ka bit ka biang ki nongtrei bylla ing briew.

Ha ka 27 tarik u Iaiong, ka kynhun kine ki nongtrei bylla ing briew ba la lam khmat da ki dkhot ka All Meghalaya Domestic Workers’ Union (AMDWU) ka la leit ban ia kynduh ia u Myntri Rangbah ka Jylla u Conrad K Sangma bad kyntu ia u ban tuklar lem halor kane ka kam.

“Ki nongbylla trei ing ki don ha ka jingeh kaba khraw wat ban pynbiang ia ki jingdonkam kiba man la ka sngi ha ka jingim jong ki na kum kine ki jingbylla “, la ong ka Kong Wanpynhun Kharsyntiew kaba dei ka dkhot na ka North East Regional Domestic Workers Movement hynne ka sngi ha ka jingialang bad ki nongthoh khubor ha Shillong Press Club.

Ka Kong Kharsyntiew ka la ong haduh mynta kam don ka jingryntih ha kaba ia dei bad ka jingsiew bainong sha ki nongtrei bylla ing briew. Ka la pyntip ba ka jylla Assam ka la dep ban buh ryntih ia ki bainong bad jingsiew sha ki nongtrei bylla ing briew.

Ka All Meghalaya Domestic Workers’ Union ka kwah ba ki nongtrei bylla ing briew ha ka jylla ki dei ban shah kynthup ha ka Schedule Employment lyngba ka jingai jingtip jong ka Minimum Wages Act, 1948, na ka bynta ban buh ryntih ia ka jingsiew bad ka jing-pynrung ia ka ain ban ioh bainong ryntih.

Ka union ka la kyntu ia ka sorkar jylla ban ba buh ne thaw ia ka Welfare Board na ka bynta ka bit ka biang jong ki nongtrei bylla sngi ha ing briew. Ka Welfare Board kan pyntrei kam ia shibun tylli ki kam kum ka jingpynrung kyrteng ia ki nongbylla sngi, ka jingai jingiarap haba jia ki jingjia sngewsih kiba long kyndit, ka bai lutksan ha ka pang ka shitom, ka pisa jingiarap ia ki kynthei kiba armet kiba don ha ka thup ki nongtrei bylla sngi ha ki ing briew.

Ka Kong Kharsyntiew ka la pyntip ka All Meghalaya Domestic Workers’ Union kan wanrah da ka ‘Wage Card’ ban pyni ia ka jingmynjur ia ka dor jingsiew ban siew ia ko nongtrei bylla sngi katkum ki kam bad por ba ki trei.

Katkum kane ka jingpyni jingmynjur kin don lai bynta ki kyrdan trei jong ki nongtrei bylla sngi – kiba shong ba sah lang bad ki nongai bylla, ki ba bylla kynta bad baroh shi sngi bad kiwei kiwei pat.

Ka Kong Kharsyntiew, ka la iathuh ba ka bainong kaba shisien shi bnai na ka bynta kiba trei kynta ha kaba ki kam ki long – saitjain, sait tiar, pynkhuid ing pynkhuid kper bad ka ba leit iew la buh ba kan long 1800 shi bnai.

Na ka bynta ka kam shet bad leit on ne shaw skul ka bainong kan long 2000 tyngka shi bnai. Hynrei ka kam ri khyllung bad ia ki tymmen bad kaba long baroh shi sngi, ka bainong kan long 8000 tyngka shi bnai.

Na ka bynta kiba shong bad sah bad kiba ai jingbylla, ka All Meghalaya Domestic Workers’ Union ka la buh ba kan long 5000 tyngka shi bnai (kynthup ka bam, ka thiah ka dem bad kiwei kiwei ki jingdonkam).

Katkum ka jingpyni jingmynjur jong ka Union, ki nongtrei bylla sngi kiba shong ba sah bad ki trai ing kin ioh ruh ka sngi shong pynjah thait kaba long shi sien shi taiew.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589