Haduh 30 tarik yn khangdam biang ki jaka pule: Naduh 15 tarik dei ban sdang wan trei sha ophis

????????????????????????????????????

Shillong, Ïaiong 6: Ka kynhun Myntri kaba kynduh lang ha ka sngi Nyngkong ban buddien halor ki sienjam kiba ïadei na ka bynta ka jingïakhun pyrshah ia u corona virus, ka la shim ia ka rai ban bteng khang dam biang shwa ia ki skul haduh ka 30 tarik mynta u bnai. Kawei pat ka rai ka long ba ki shakri sorkar naduh ka 15tarik mynta u bnai ki la dei ban poi ryntih noh sha ki ophis treikam jong ki.

Haba pynbna ia kitei ki rai ba la shim da ka kynhun myntri, u Symbud Myntri Rangbah ka jylla, Bah Prestone Tynsong u la ong ba ka sorkar ka la shim ruh katto katne ki rai kiba ïadei na ka bynta ki paid nongshong shnong la ka long ha ka rep ka riang, ha ki ïew ki hat kynthup ruh ia ka leit ka wan bad ka trei ka ktah.

 Ki rai kiba bniah ba ka sorkar jylla ka shim ha katei ka sngi ki long –

  1. Haba ïadei bad ki skul: Ka sorkar lyngba ka tnad Education kan hap ban peit thuh shwa haduh ka 30tarik u Ïaiong ha shwa ba kan shim ia kiwei pat ki rai la yn bteng biang ban khang lane ban plie noh ia kitei ki jaka pule.
  2. Na bynta ki nongtrei sorkar : La rai ba ki nongtrei sorkar naduh ka 15tarik mynta ubnai ba ki dei ban poi ryntih noh sha ki jaka treikam jong ki
  3. Kali kamai : Ka kynhun Myntri ka la pynbna ba ia mynta hi kim pat shah ia ki kali kamai ban iaid hynrei tang ia ki kali shimet ban pyndonkam ha ka leit ka wan.
  4. Ki ïew ki hat : U Symbud Myntri Rangbah u la pynbna ba la shah ba yn plie noh ia ki ïew  ha ki nongkyndong kata ia kito ki ïew kiba ju long shi taïew, kata ruh ryngkat ka jingbthah ba ki dei ban bud pyrkhing ia ki kyndon ba la buh da ka tnad ka Koit ka Khiah.
  5. Halor ki nongrep: Ka sorkar ka rai ban ai lad kyrpang ia ki nongrep ba kin sdang noh ban thung ban tep lane ban bet ia u symbai ha ki lyngkha bad ki bri jong ki. Tangba la kyntu jur pat ia ki ba kin hap ban da bud pyrkhing ia ki kyndon ba la buh da ka tnad ka Koit ka Khiah ka Jylla.
  6. Halor ka MGNREGA : La rai ba ia ki kam kiba ïadei bad ka bylla 100 sngi ne ka MGNREGA ki paidbah ki lah ban sdang biang ha ki shnong ki thaw jong ki. La ïathuh ruh ba ka sorkar ka la dep ban pyllait haduh T.534.4573 klur tyngka lyngba ki Block Development Officer na ka bynta ban siew ia ka bai nongtrei bad ruh na ka bynta ka bai tiar.
  7. Song jingïarap kyrpang: Ka sorkar ka la pynbna ruh ba kin ai ia ki song jingïarap ka ban long 700 tyngka shi taïew sha kito kiba ju im ja da kaba trei ia ki kam die jingdie dukan rit kum kiba die waidong, die soh bad ruh kito kiba shu bylla sngi lyngba ka skim Chief Minister relief against wage lost scheme. La batai bniah ruh ba kitei ki nongioh jingmyntoi kin dei tang ia kito ki bym pat don kyrteng ha kiwei kiwei pat ki thup ioh jingmyntoi.
  8. Na bynta kiba don shabar jylla : Ka sorkar ka la pynbna ba ki don haduh 2192 ngut ki samla pule kynthup ia kiba la trei kiba don mynta ha kylleng ki bynta jong ka jylla. Kumta halor kane ka bynta, u Symbud Myntri Rangbah u kyntu jur ia ki ba kin iai shah shipor ban sah shwa ha kito ki jaka ba ki don mynta katba ka jinglong jingman halor u Corona Virus kam pat shngain. U la ong ruh ba katei ka sienjam ba ka sorkar ka shim ka long na ka bynta ka jingshngain jong ki paidbah ka jylla kaba dang iakhun tyngeh ban lait na ka jingphriang jong u khniang corona virus.
  9. La rai ruh ba naduh ka 15tarik u Ïaiong, ki jingtei bapher bapher kynthup naduh ka surok bad kiwei kiwei ki kam pynroi kiba sahteng naduh u snem ba la dep ki lah ban bteng biang ban trei.   

1 thought on “Haduh 30 tarik yn khangdam biang ki jaka pule: Naduh 15 tarik dei ban sdang wan trei sha ophis

  1. Sir, haba ïa dei bad ki tourist driver pat ngam iohi ba phi kdew ha kato ka jingialang jong phi.
    Sir, lada long kaba lah sngew bha se sir ïa rap ïa ki bapli ruh namar ma ki ruh kim lah shuh ban lei kamai.
    Khublei shibun…

Comments are closed.

Door Step Delivery Of Medicine

We Advertise

Shillong Mail shillongmailnews@shillongmail.com

  • 7085718589
  • Head Office: Langkyrding Mihngi
    Shillong
    For Advertisements
    Call Us Here 98634-49079
  • ################