Ka jingdon kiba ïoh Covid-19 hapoh ka Jylla ka la hiar hapoh 1000

Shillong, Naiwieng 3: Ka jingdon ki briew kiba dang ïa bit thymmai ïa u khniang jingpang Coronavirus ka la hiar biang namar tang ha kane ka sngi Ba-ar ki don tang 63 ngut katba kiba koit pat ki la poi haduh 101 ngut.

Kitei kiba ioh thymmai ïa utei u khniang jingpang ki kynthup ïa ki 19 ngut na East Khasi Hills, 11 ngut na Ri  Bhoi, 08 ngut na East Jaintia Hills bad West Jaintia hills, 06 ngut na West Garo Hills, 04 ngut na West Khasi Hills, 03 ngut na East Garo Hills, 02 ngut na South Garo Hills bad mar iwei na North Garo Hills bad South West Garo Hills.

Katba ka jingdon kiba koit pat ki kynthup ïa  ki 40 ngut na West Khasi Hills, 23 ngut na West Jaintia hills, 11 ngut na East Garo Hills bad Ri Bhoi, 07 ngut na East Khasi Hills, 05 ngut na West Garo Hills, 03 ngut na East Jaintia Hills bad 01 na North Garo Hills.

Kumba long haduh mynta ka sngi, ka jingdon ki briew kiba don ïa utei u virus ki long sa tang 971 ngut, kata ruh ha baroh kawei ka jylla. Katba ka jingdon kiba koit pat ka la kynjoh sha ka 8680 ngut. Ha kajuh ka por, ka jylla ka sakhi mynta la lai sngi ba kim shym la don shuh kiba ïap bad kumta ka jingdon kiba ïap ka neh beit da ki 90 ngut.