Ka test kaba lai ruh ka pyni ba ka nongpang Covid-19 ka dang dei positive: Dy CM

Shillong, Jymmang 5: Ka Meghalaya kam pat lait satia na ka khlam COVID-19 hadien ba ka report kaba mih na ka test kaba lai jong ka nongpang ba khatduh kaba mih hynne ka sngi Baar ka kdew ba ka dang long postive biang, ong u Symbud Myntri Rangbah ka jylla, Bah Prestone Tynsong.

Halor kane, u Bah Prestone u kyntu jur ïa ki paidbah ka jylla khkamtam ïa ka nongpang ba kan ym syier ne rit mynsiem. “Ki don ki jingjia kiba kum kine ha  kiwei ruh ki jylla jong ka ri India ha kaba ki nongpang ki hap ban shah test haduh hynriew sien ban ioh ïa ka report kaba negative,” u la ong.

Lah ban kdew hangne ba ka la don ka jingjia kaba ïadei bad ka nongrwai ba pawnam, ka Kanika Kapoor kaba la pynbna ba ka la koit pura hadien ba ka test kaba 5 bad kaba 6 ka la paw ba ka long negative.

Ïa katei ka nongrwai la lap ba ka ioh ïa utei u khniang jingpang ha ka 20tarik u Lber hynrei ha ka 06tarik u Iaiong ka la lait noh na ka jaka sumar jong ka, na Sanjay Gandhi Post Graduate Institute of Medical Sciences, Lucknow.

Haba ïadei bad ka nongpang na ka jylla, u Symbud Myntri Rangbah u la ïathuh ba ïa ka test kaba saw kin sa leh biang hadien lai sngi kaba long katkum ka kyndon ba la buh da ka WHO bad ka  Ministry of Health and Family Welfare jong ka sorkar India bad ruh na ka Department of Health and Family Welfare ka sorkar Meghalaya.

Kumban shu kdew hangne, katei ka nongpang ka la paw Negative ha ka test kaba nyngkong hynrei ha ki ar tylli ki test kiba bud ka la paw positive biang.

Haba phai pat sha ki 10 ngut kiwei ki nongpang, baroh ki la paw negative ha baroh ar sien test bad kumta na ka liang ka sorkar jylla kala pynbna ba ki la koit pura.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589