Katno ngut napdeng ki riewkhmat kin shah jied ha u paidbah ban ïoh long nongmihkhmat

Shillong, Rymphang 27: Katba ka jingthep vote ka la nang ïaid shakhmat naduh ba la sdang ïa ka ha ka por 7 baje mynta ka sngi, ka jingkylli kaba mih mynta ka long, katno ngut na ki riew pawkhmat kiba la ïakhun ha kane ka ilekshon MDC sha ka Khasi Hills Autonomous District Council (KHADC) bad Jaintia Hills Autonomous District Council (JHADC) kin shah jied ha ki paidbah na ka bynta ba kin long ki nongmihkhmat sha ka District Council.

Ha kane ka ilekshon MDC sha KHADC-JHADC ki don bun ki kyrtong kiba long ki riew pawkhmat naduh ka jingaireng jong arngut ki MLA ha KHADC, ki MLA ki barim, ki MDC kiba la kham paw bad kiba la ju long teng kum ki CEM ha artylli ki council.

Kiba kham bun na ki riew pawkhmat kidei hapoh ka ilekshon KHADC kiba kynthup ïa ki MLA kiba mynta u bah Lambor Malngiang na Nongkrem kum u kyrtong shimet bad u bah Gigur Myrthong na Mawshynrut na ka seng NPP.

Kiwei ki kynthup ïa ki myntri barim ka jylla bad kiba long ruh kum ki MLA barim, u bah Ronnie V Lyngdoh na ka INC na Mylliem, u bha Paul Lyngdoh (UDP) na Jaïaw konstitwensi, u CEM barim, u bah Pynshngaiñ N Syiem (NPP) uba aireng na Mawkhar-Pynthorumkhrah, u bah KP Pangngiang (HSPDP) na Rambrai Jyrngam, bah Titos Chyne (UDP) na Sohra bad u bah Embhahlang Syiemlieh (UDP) na Mawlai.

Ha kane ka ilekshon, u CEM barim ka KHADC u bah Rangkynsai Makdoh uba la ïoh tiket na ka NPP ruh un ïakhun na Nongpoh konstitwensi bad uwei pat udei u nongïalam barim ha ka kyrdan kum u General Secretary jong ka seng ki samla pule kaba paw hapoh ka jylla, ka seng Khasi Students Union, u bah Auguster Jyrwa.

Ha JHADC pat ki don katto katne ngut ki riew pawkhmat ki kynthup ïa u bah Madonbai Rymbai uba long u CEM ba mynta u ban ïakhun na ka seng NPP na ka 4-Sohmynting Khliehtyrshi konstitwensi, u MLA barim ka Mookaiaw u bah Robinus Syngkon (NPP) na Raliang, u bah Moonlight Pariat (UDP) na 19 Jowai South, u bah Lamdibok Sumer (UDP) na War East bad u bah Andrew Shullai (INC) na Jowai Central.

Katkum ka jingtip kaba don ha ka tnat District Council Affairs, ki paidbah nongthep vote ha artylli ki council ki don palat 10 lak bad kine kin dei ki paidbah ki ban ai ïa rai na ka bynta ki 58 ngut ki kyrtong hapoh ka KHADC-JHADC.

Ha KHADC, ka jingdon ki nongthep vote ka kot haduh 8,28,774 lak katba ha JHADC, ka jingdon ki nongthep vote ka long haduh 2,51,514 lak.

Hynrei ka jubab kaba thikna kaba yn ïoh kan dei hi ha ka 2 tarik u Lber, 2019, la ki paidbah ki dang I mon ne em ïa kine ki riew pawkhmat ba kin long ki nongmihkhmat sha ka District Council.

Ki don 131 ngut ki kyrtong kiba iakhun hapoh ka KHADC katba ki don 101 ngut ki kyrtong na ka bynta ka JHADC. Ha baroh ar tylli ki Council, ki don mar 19 ngut ki kyrtong shimet.

Ki seng sain pyrthei kiba pawkhmat kiba ïakhun ïa kane ka ilekshon ki kynthup ïa ka Indian National Congress, National People’s Party, United Democratic Party, Hill State People’s Democratic Party, People’s Democratic Front bad ka Khun Hynñiewtrep National Awakening Movement.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589