Khot noh da kito ki samla bym pat ïohkam Nurse kum ki Volunteer : John Kharshiing

Shillong, Ïaiong 19 : U Chairman ka Grand Council of Chiefs ka jylla, u Bah John F Kharshiing, u la ai jingmut ïa ka sorkar jylla ba kadei ban khot biang da kito ki samla ba khlem pat ioh kam nurse ban long kum ki nongïarap ne Basic Volunteer Nurse ha ka jingïakhun jong ka sorkar pyrshah ïa u COVID -19.

Halor katei ka jingai jingmut, na ka liang u Deputy Secretary ka tnad Health and Family Welfare ka jylla, u Bah AP Nongbri u la phah pat sha u Director ka tnad Health Services ka jylla, u Dr. Aman Warr ban bishar bniah.

“Ki don bun bha ki samla shynrang bad kynthei kiba khlem lah satia ban ioh long nurse ba kin wan ïarap kum ki nurse ryngkat ka jingsiew na ka bynta katto katne por ha ki hospital bapher bapher ne CHC bad kiwei kiwei ki jaka ai jingsumar ha ka jingïakhun jong ka jylla ïa katei ka khlam COVID-19. Ïa kane la dep ban ïa kren ruh ha ki jingïalang kiba la dep halor ka jingduna ki nongtrei,” ong u Bah Nongbri.

Na ka liang u Bah Kharshiing pat ha ka shithi ba u phah sha u Myntri Rangbah ka jylla ha ka 08tarik mynta u bnai u la ong, “Ngi kwah ban kdew ba ka don ka jingsyier kaba khraw kylleng halor ki lad ai jingïada khamtam ha ka jingkiew stet jong kane ka jingpang khlam kylleng ki ri ka pyrthei bad don ruh ki ri kiba la kynduh jingeh namar ka jingduna ki nongtrei.”

U la ong ruh haba ki peit halor ka jingpynkhreh jong ka sorkar pdeng badka jylla ban kyntiew ïa ki jaka sah kyrpang bad ruh ki jingthiah ICU, kim iohi pat ba ka don ka jingpynkhreh kaba kham bniah ban pynkhlaiñ ne pynbun ki nongtrei ha katei ka tnad kaba la tikna ba ka donkam bun bha ha man ki jaka sah kyrpang (Isolation Room) bad ki jingthiah ICU.

U Bah Kharshiing u la ai ingmut ruh ïa ka sorkar jylla ba kan ai jingmut wat ïa ka Meghalaya Public Service Commission bad ka tnad ka Koit ka Khiah ban peit bad buddien lut ïa ki thup kyrteng jong kito ki samla kiba khlem ioh ïa ka kam nurse bad khot lut ïa ki ban trei bad ki jaka ai jingsumar khnang ba la kumno kumno kin lah pat ban ai ka jingshakri kum ki nongïarap (basic volunteer nurse) ha kane ka kynti ba ka jylla ka pynkhreh ban ïakhun da kaba tyngeh ban khanglad ïa ka jingphriang kane ka jingpang khlam ha ka jylla.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589