Mang ka tnat PHE ban pynpoi um haduh 1.80 lak tylli ki longïing

Shillong, Jylliew 02: Ka tnad Public Health Engineering (PHE) ka Sorkar Jylla ka buh thong ba la kumno kumno na u snem mang tyngka 2020-2021 kan lah ban pynpoi um bam um dih sha ki 1 lak 80 hajar tylli ki longïing khamtam ha ki thaiñ nongkyndong jong ka Jylla.Ïa kane la pyntip da u Myntri Sorkar Jylla ba dei peit ïa ka tnad PHE, u Bah Samlin Malngiang uba la pynpaw ba ïa kane ka yn pyntreikam na ka mang tyngka jong ka Jal Jeevan Mission ka Sorkar Pdeng.

Kum ban shu kdew ba ka Jal Jeevan Mission ka dei ka thong treikam ka Sorkar Pdeng ban pynpoi um bam sha kawei pa kawei ka longing ha shwa u snem 2024.“Ha u snem mamg tyngka 2019-2020, ngi la ïoh tang 35 klur tyngka na ka Mission ka Sorkar Pdeng hynrei mynta ha une u snem mang tyngka ngin ïoh kumba 175 klur bad ngi buh thong ban pynpoi um sha ki 1,80,000 tylli ki longïing”.

“Ngi la thaw ïa ka Annual Action Plan ban pyntreikam ïa ki Water Supply Scheme bapher bapher ha ka mang pynlut kaba kham bun ha une snem mang tyngka. Hynrei ngi ngeit skhem ba ngin ïoh kham bun ka mang tyngka”, u la ong bad bynrap, “Ka shong ha ka mang tyngka bad na ka liang jong ngi ka tnad ngi la long pynkhreh ban pyntreikam ïa ki Water Supply Scheme bapher bapher”.

Da kaba ïa thuh ba u snem ba la dep ka la don ka jingïakynduh na ka liang ka Sorkar Jylla bad Sorkar Pdeng ban ïa kren halor ka jingpyntreikam ïa kane ka Mission lyngba ka tnad PHE, u Myntri u la ong, “Ngi la ai jingmut ba la kumno kumno ba ha kane ka Mission dei ban ïoh bynta lang ki nongshong shnong baroh ka Jylla hi baroh kawei”.

“Ngi kum ka Jylla bad kum u Myntri nga la ai ka jingkren ba ban pyntrei kam ïa kane ka skhim ka mut na ka liang jong ngi hi ngi donkam ban peit ban jngoh ban pynïaid beit pynïaid ryntih lyngba ka tnad PHE. Khnang ba kan long kaba itynnad ngi donkam ïa ki engineer ki ophisar ban pynïaid ïa ka skhim lada khlem ki nongpeit bniah kan long kaba eh ban pynïaid beit ryntih ïa ki skhim”, u la ong.

“Na ka liang ka PHE ka long kum ka Nodal Agency ban pyntreikam ïa ka Jal Jeevan Mission. Ha ka Jylla ngi don 1096 tylli ki shnong haba ngi buh thong ban pyntreikam ïa ki skhim um ban pynpoi um lut ha man ki shnong man kawei pa kawei ka longïing kiba don kumba 5 lak tylli”, u la ong.

“Ka thong ka long kaba heh bad ka shong ha ka mang tyngka ban ai ïa ngi bad ka jingpynkhreh na ka tnad ka long kaba la biang na ka bynta ban pyntreikam ïa ki skhim bapher bapher”, u la ong. “Ngi kwah ba ka Sorkar Pdeng kan kyntiew ïa ka bha tyngka kumba ngi mang ngi kwah ban ïoh”, u la ong da kaba pynpaw ba un rah ïa kren ïa kane ka mat bad u Myntri Rangbha ka Jylla.

“Haba pyntrei ïa ki shim um hap test ïa ka ha ki laboratory khnang ba kan long kaba biang. Nga kum u Myntri nga don jingkitkhlieh ba kane ka skhim kan long ka jingmyntoi ïa ki paidbah nongshong bad ba kin ïoh ïoh syndon ka um kaba khuid ba suda haduh ing”, u la ong.

U la ong ba kaba kongsan eh ka dei ka tyllong um bad donkam ban ïoh kaba heh bad kiba biang bha. “Wat ki skhim kiba la rim hap ban pynkhlaiñ ïa ki na kane ka Mission. Ki don ki jaka ba ki tyllong ki kham jynjar bad jngai ngi hap ban pynbiang ïa ki pipe ban pynpoi um sha ki TP bad yn sa phah sha ki Zonal Tank”, u la ong.

Da kaba ïathuh ba ki don ki skhim ki ban yn pyntrei noh shen kum ha Laitkor, Mawphlang bad Sohiong, u la ong , “Ki don ki don ki skhim kiba dang ïaid bad hap pyndep da kane ka Mission. Ki skhim barim hap pynbha bad donkam ban pynkhlaiñ ïa ki bad ki pipe ba la rim ruh donkam ban bujli”, u la ong.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589