Mynjur ka liang synshar bad ka liang pyrshah ban ïatreilang ban ïakhun ïa u COVID-19: Lamphang

Shillong, Ïaiong 25 : U Lamphang ka Iing Dorbar Thawaiñ ka jylla, u Myntri Rangbah ka jylla, Conrad K Sangma, nangta u kumjuh u Symbud Myntri Rangbah, Bah Prestone Tynsong kynthup ïa u Nongïalam ka Liang Pyrshah, Dr. Mukul Sangma nalor ki Myntri sorkar bad ki MLA ki la shong ïa ka jingïalang kaba kyrpang ban ïa syllok bad phylliew jingmut kumno ban ïakhun ïa kane ka khlam COVID-19. 


Ka rai kaba mih na katei ka jingïalang ba la soi lang da baroh lai ngut, kata u Myntri Rangbah, Lamphang bad ruh na u Nongïalam ka Liang Pyrshah, ki la pyntip ba ka la don ka jingïasyllok kaba sani bha kynthup ïa ka jingbatai kaba bniah (presentation) na u Chief Secretary ka jylla khamtam ïa ki sienjam ba la shim da ka sorkar ban tehlakam ïa ka jingphriang jong utei u khñiang jingpang, nangta ban pynpoi ïa ki marbam mardih, ki jingiarap bad kiwei kiwei. 


Ha katei ka jingïalang, la donlang ruh naduh u Myntri Kampohiing ka jylla, Bah Lahkmen Rymbui, Myntri ka tnad ka Koit ka Khiah, Bah AL Hek, bad kiwei kiwei ki MLA nalor ki ophisar ba kynthup ia u Chief Secretary u MS Rao, ki ophisar jong ka tnad ka Koit ka Khiah, ka tnad Food and Civil Supplies, ka tnad Pla Tyngka bad kiwei kiwei. 


Nalorkata, la pyntip ruh ba ka jingdon ki tiar ban test ka la nang bun naduh ba ioh nyngkong ïa katei ka khlam. “Ka jingtest da ki  RT-PCR kan nang kiew na ka 90 sha ka 370 tylli hapoh jong ka shiteng bnai u Jymmang. Bad kin don kumba 50,000 tylli ki ‘antibody RD kits’ ha ka taiew ba nyngkong jong u Jymmang,” bynrap shuh shuh katei ka jingthoh ba la phah da kitei ki lai ngut. 


Ki la ong ruh ba ka la don ka jingpynkhlaiñ wat ïa ka jingtreikam ha ki jaka ai jingsumar. Nalorkata, ki la kdew ruh ba la pynbiang wat ïa ki tiar ai jingsumar ha baroh kawei ka jylla, kata kynthup ïa ki PPE kiba don 64,458 tylli,  N95 mask 80,190, BiPAP Machines – 60 bad 3-ply mask – 5,10,000 tylli.


“La buh ruh ïa ki Quarantine, Corona-Care bad Isolation Centres ha baroh kawei ka jylla kum ka jingpynkhreh lypa.  La dep ban peit ruh ïa ka jingdonkam la ka long ïa ki Doktor bad kiwei kiwei ki nongtrei ba dei ha katei ka laiñ kynthup ïa ki nongñiah ïa ki ambulance bad  ki nongtrei ha ki jaka ai jingsumar,” ki la bynrap biang. 


Shuh shuh la ïathuh ruh ba ka sorkar ka la buddien bad peitngor ia baroh ki 5,200 ngut ki briew kiba la rejistar haba iadei bad katei ka khlam.


  “Ka jingpynpoi ïa ki marbam kaba dei na ka bynta u Iaiong na ka bynta ki 21, 45, 145 ngut ki nongioh jingmyntoi na ka NFSA 7, 72, 694 ngut na ka Non NFSA la dep ban pyllait lut. Ka jingsam ïa ka bhah na ka bynta u bnai Jymmang ruh ka la don ha lynti,” ki la ong.


Ha kawei pat ka liang ki la pyntip ba ka jingpynpoi ïa ka jingkyrshan pisa kaba long 3,000 tyngka na ka bynta ki 10,287 ngut ki samla na ka jylla kynthup ïa kiba dang pule bad ba la trei kiba dang sahkut sha bar jong ka jylla, ka kam ka la iaid shakhmat. 


Katkum katei ka rai ba ki shim, la kdew ruh ba ka la don ka jingpyllait ïa ki jingkyrshan pisa kiba pher bapher kiba wan na ki skim kum ka PM KISAN kaba la pynmyntoi ïa ki 87, 187 ngut ki nongrep kiba ioh 2,000 tyngka shisien ioh, nangta ka PM Jan Dhan Yojana kaban pynmyntoi ïa ki 3,01,428 ngut ki longkmie kiban ioh 1,500 tyngka, kumjuh ïa ki nongbylla trei iing trei surok kiba don 17,649 ngut kiban ioh mar 3000 tyngka bad ruh ka jingkyrshan pisa na ka bynta kiwei pat ki nongbylla kiba don kumba 2,02,281 ngut kiban ioh ïa ka jingsiew kaba  mar 2,100 tyngka hadien ba la dep bishar ïa ki kot ki sla jong ki bad ruh ïa ki tiar na ka bynta  kito ki longïing kiba set slung hi ha la ki iing ki sem (home quarantine) kiba don 5,2000 iing. 

Ka la don ruh ka jingai jingmut na baroh ki MLA jong ka Liang Pyrshah bad Liang Synshar kumno ban iaid shakhmat ban iakhun ia utei u khñiang jingpang. 


Ka jingïalang ka la rai ruh ban kyntu ïa ki nongshong shnong ka jylla ba kin ai ka jingkyrshan ïa kito ki briew kiba ioh ïa katei ka khlam kynthup ïa kito kiba dang don mynta ha ki jaka set slung ïalade khnang ba kin ym sngew marwei ne sngew tmang ha ka imlang sahlang ne ha ki iing ki sem.


La kyntu jur ruh ba ym dei satia ban don ka jingisih ne jingpeit matdong ïa kito ki briew kiba kynduh ïa kum katei ka jingjia hynrei ban pdiang beit ïa ki ha ka imlang sahlang da kaba bud pyrkhing pat ïa ki kyndon ba la buh da ka sorkar jylla.


  “Katkum ka jinglum jingtip, kiba bun kiba shah ktah ha utei u khñiang jingpang kim donkam satia ban leit sah hospital hynrei ki koit hi da kaba set slung ha la iing. Ka sorkar mynta ka la pynkhreh ban iakhun tyngeh ïa kane ka khlam khamtam ïa kito kiba donkam ban sumar ha ki jaka ai jingsumar. Kumta, to burom bad long kiba ia trei lang bad ki nongtrei ha ka tnad ka koit ka khiah kumjuh ïa kito kiba mih shakhmat ban iakhun lang ïa katei ka thma,” ki la bynrap biang.  

Door Step Delivery Of Medicine

We Advertise

Shillong Mail shillongmailnews@shillongmail.com

  • 7085718589
  • Head Office: Langkyrding Mihngi
    Shillong
    For Advertisements
    Call Us Here 98634-49079
  • ################