‘Nga ieng ilekshon ym ban kynthoh briew, ka rai kadei jong u paidbah’

Shillong, Rymphang 24: U kyrtong ka seng Hills State People’s Democratic Party (HSPDP) na Laban-Mawprem konstitwensi, u bah Banrikupar Wahlang ha ka jingïalap ilekshon ka jong u ha ka sngi saitjaiñ u la ong, kane ka ilekshon kam khang lynti shuh ïa u ban long u nongjop namar ka jingïoh jingieit na ki paidbah.

U bah Banrikupar u ban ïakhun ïa ka ilekshon jied nongmihkhmat sha ka Ïing Dorbar Thaw-aiñ ka Khasi Hills Autonomous District Council (KHADC) u la ong, “kat shaba nga ïaid ban tyrwa ïalade bad pan jingkyrshan na ki paidbah ha kane ka kynti ba mynta, nga don ka jingkyrmen ba ngan ïoh ïa ka jingjop”.

Haba pan jingkyrshan na ki paidbah ka Laban-Mawprem konstitwensi, u bah Banrikupar u la pynkynmaw ba ha ka ilekshon MDC ha u snem 2014 u la shah rem tang da 107 vote.

“Ki paidbah nongshong shnong ka Laban-Mawprem konstitwensi ki la kyrshan ïa nga da ka jingshaniah bad ka jingieid ha ka ilekshon ba la dep bad dei ha kane ka nongrim ba nga sngewskhem bad ngam duh jingkyrmen mynta ka kynti”, la ong u bah Banrikupar.

Ha katei ka sngi, u bah Banrikupar u la ong, u ieng ilekshon ym ban kynthoh ïano ïano namar ka rai kaba stad ka shong ha ki paidbah ba uno udei u briew uba I bit ban kit ïa ka khia ka shon khamtam ban ïasaid kumno ban thaw ïa ki aiñ ki ban ïada ïa ka riti dustur kaba u barim u bajah u la seng nongrim.

U la ong, u ieng ilekshon ruh na ka daw ba kwah ban ïasaid kumno ban dang ai bor shuh shuh ha synshar khadar, ha kaba ïa dei bad ki rangbah shnong bad u la pynpaw ïa ka jingsngew khia ba ka Village Administration Bill kat haduh mynta hi kam pat long aiñ, kaba long ka aiñ kaba lah ban pynkup bor ïa ki bor synshar shnong.

U la kynthoh halor ka jingthmu ka sorkar pdeng ban pyntrei-kam ïa ka Citizenship Amendment Bill bad ka rukom shim sting ki nongthaw-ain kiba don ha ka BJP ha kaba ïadei bad kane ka Bill.

“Ngim don ki aiñ kiba skhem ban ïada ïa ka jingwan rung kyrthep ki bar jylla ne bar ri bad ngin shah tyllep kum ka jaidbynriew lada kum ïa ka Citizenship Amendment Bill yn thmu pyntrei-kam”, u la ong da kaba bynrap, “Kiba mih khmat ha KHADC ki dei ban sngewthuh ba ka District Council ka dei ka ain ka dei ka bor ban ïada ïa ka jaidbynriew”.

Ha kane ka jingïalang la wan ruh ban ia donlang da ki MLA ka HSPDP- u bah Samlin Malngiang bad u bah Renikton Lyngdoh.

1 thought on “‘Nga ieng ilekshon ym ban kynthoh briew, ka rai kadei jong u paidbah’

Comments are closed.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589