Palat 1000 ngut ki ban wanphai ïing na Karnataka, khyndiat ngut kiba rai ban sah

Shillong, Jymmang 17: Ka sorkar Meghalaya ka la pynbiang da ki rel kyrpang ban leit shaw ïa ki nong Meghalaya kiba don ha kylleng ki bynta jongka Karnataka khnang ba kin ioh ban wanphai noh sha la iing. La ioh jingtip ruh ba ki don palat 1000 ngut kiba la jied ban wanphai noh sha la iing.

Tangba, la ioh jingtip pat ba ki don bun kiwei pat kynthup ïa ki samla pule na ki college bapher bapher ba don ha Bengaluru kiba la jied ban sah shwa sha katei ka jylla da kaba kdew ba kim kwah satia ban buh ïalade ha ka jingsyier da kaba leit lang ha ka rel, nangta ka eksam bad khamtam eh ka jingset khop ïalade ha la ki iing ki sem.
Na ka liang u Banteilang Kharmawlong, u samla pule jong ka St. Claret College ha Bengaluru u la ong, “Ban leit da ka rel khlem artatien ka don bun bha ka jingsyier namar kan don beit ka jingïalum ne ïa kynduh bad bun bha ki briew bad kumta ban khanglad ïa ka jingphyriang u virus, ka khambha ba ngan sah shwa shane.”

Nalorkata, u la ong, “Ka la bha ïanga ba ngan husiar shwa, namar ki jingdon kiba ioh ïa utei u khniang jingpang ki la nang kiew man ka sngi. Kumta lada nga leit phai iing, ngan sa shah ktah wat ha ki jingpule ruh. Ngan ym lah ban pynleit jingmut na ka bynta ban pynkhreh ïa ka eksam. Shuh shuh lada jia ba la pynbna ïa ka eksam, ka por jongnga kan shu lehnohei namar ngan hap ban pynlut haduh 28 sngi ban set khop ïalade ha i kamra.”

Kiwei pat ki samla pule kiba rai ban sah shwa ki la kdew ba lada ki wanphai iing ka long kumba buh jingeh pynban ïa ki bahaiing namar ma ki ruh ki hap ban set kut lang ha ki iing ki sem na ka bynta 28 sngi ryngkat lang bad ki.

La ïathuh ruh ba kito ki samla pule kiba don ha ki snem ba khatduh jong ka jingpule (final year) ki la pynpaw ba kaba kham khuslai ïa ki kadei na ka bynta ka eksam namar ym lah ban tip la yn pynlong da ka ‘online’ lane ka ‘offline’.

Door Step Delivery Of Medicine

We Advertise

S

  • Phone
    7085718589
  • Email
  • Address
    Office: Lower Lachumiere Near Pear Tree Guest House
    Shillong, 793001
    For Advertisements
    Call Us Here 98634-49079/7085718589